О́tken senbide atalǵan poıyzdyń 5-vagonyna Qurmanǵazy aýdanynyń ortalyǵynan Kenjegúl Qaıyrbolatova mingen. Maqsaty – Atyraý qalasyna jetý. Alaıda tańǵy saǵat 5-te júkti kelinshektiń tolǵaǵy bastalǵan. Poıyz bastyǵy Sáýle Ilııasovanyń jolserikter brıgadasy kómekke umtylady. Nusqaýlyqqa sáıkes bolǵan jaıtty mashınıske habarlap, jedel járdem brıgadasyn eń jaqyn stansaǵa shaqyrýǵa sheshim qabyldaıdy.
Alaıda jedel járdem brıgadasyn kútý múmkin bolmady. Poıyz jolserikteri Myrzagúl Qarajigitova, Marııash Orazǵalıeva men Laýra Kamalova júkti áıeldi bosandyrýǵa kirisedi. Tańǵy saǵat 05:30-da jedel járdem kóliginde emes, poıyz vagonynda kishkentaı burymdy dúnıege keldi.
– Jolaýshylar poıyzynda jumys istegen 15 jylda alǵash ret júkti anany bosandyrdyq. Bizdiń kompanııada osyndaı tosyn jaǵdaıda áreket etýge úıretedi ǵoı. Sondyqtan biz ár kez jolaýshylarǵa kómek kórsetýge daıynbyz, – deıdi Sáýle Ilııasova.
Atyraý stansasynda jedel járdem qyzmetkerleri jańa týǵan sábıdi anasymen birge kútip aldy. Dárigerler ananyń da, sábıdiń de densaýlyǵyn jiti tekserdi.
– Tolǵaq bastalǵanda, aldymen sábıimniń densaýlyǵy úshin alańdadym. Biraq jolserikterdiń jedel kómeginiń nátıjesinde vagonda aman-esen bosandym. Bul – esten ketpeıtin oqıǵa. Keıin qyzym óskende, qalaı, qaıda ómirge kelgenin aıtyp beremin, – deıdi Kenjegúl Qaıyrbolatova.
Atyraý oblysy
