Qazaqstan quramasy naýryz aıynda Ulttar lıgasynyń pleı-off kezeńinde Moldova fýtbolshylaryn eki match qorytyndysy boıynsha jeńip, «S» dıvızıonyndaǵy ornyn saqtap qalǵan bolatyn. Sóıtip, jańa maýsymnyń jerebesine sáıkes jerlesterimiz Ulttar lıgasynyń toptyq kezeńinde Belarýs, Slovakııa jáne Ázerbaıjan kvartetinde baq synap, alǵashqy oıynyn óz alańynda Ázerbaıjan quramasymen ótkizetin boldy.
Búgingi tańda Ázerbaıjan FIFA reıtınginde Qazaqstannan tórt saty joǵary tur. Mogamed Adıev shákirtteri naýryz aıynyń qorytyndysy boıynsha 120-satyǵa jaıǵasqan bolsa, ıtalııalyq maman Djannı De Bıazı jattyqtyratyn Ázerbaıjan 116-orynda ornalasqan. Qarsylas qurama sapynda jerlesimiz, Germanııanyń «Ersgebırge» klýbynyń shabýylshysy Dmıtrıı Nazarov óner kórsetedi. Fýtbol jankúıerleriniń biri bilse, biri bilmes, ol – Soltústik Qazaqstan oblysynyń týmasy. Degenmen D.Nazarov 2014 jyldan beri Ázerbaıjan ulttyq quramasynda oınap keledi.
Sondaı-aq Ázerbaıjan quramasynyń sapynda Portýgalııanyń «Tondela» klýbynyń shabýylshysy Renat Dadashov, Túrkııanyń «Býrsaspor» klýbynyń jartylaı qorǵaýshysy Namık Aleskerov, Zagrebtiń «Dınamosynda» oınaıtyn shabýylshy Mahır Emrelı sııaqty fýtbolshylar bar. Quramanyń deni jergilikti «Karabah» fýtbol klýbynyń fýtbolshylarynan jasaqtalǵan. Osy jıynǵa shaqyrylǵan 26 fýtbolshynyń toǵyzy – osy klýbtyń oıynshylary. Sonymen qatar 2018 jyly «Astana» klýbynda bir maýsym oınap, Qazaqstan chempıony atanǵan, shyqqan tegi brazılııalyq Rıchard Almeıda da Ázerbaıjan quramasynda oınaıdy.
3 maýsymda ótetin Ulttar lıgasy aıasyndaǵy Qazaqstan men Ázerbaıjan quramalary arasyndaǵy match eki el tarıhyndaǵy onynshy kezdesý bolmaq. Quramalar eń alǵash 2004 jyly 28 sáýirde Almatyda ótken joldastyq matchta kezdesip, oıyn qonaqtardyń jeńisimen aıaqtaldy – 3:2. Qazaqstan quramasy sapynan bul matchta Andreı Karpovıch pen Evgenıı Lýnev gol soqty.
Keıinnen eki eldiń komandalary Eýropa chempıonatynyń irikteý matchtarynda tórt ret kezdesti. Solardyń alǵashqysy 2006 jyly 6 qyrkúıekte Bakýde ótip, oıyn 1:1 esebimen teń aıaqtaldy. Alań ıelerinen Andre Ladaga esep ashsa, arada 20 mınýt ótkende Dmıtrıı Bıakov tarazy basyn teńestirdi. Qarymta kezdesý 2007 jyly 6 maýsymda Almatyda ótip, bul matchta da dál osyndaı esep tirkeldi – 1:1. Goldyń avtorlary – Výgar Nadırov pen Rýslan Baltıev.
Eýropa chempıonatynyń irikteý sheńberindegi kelesi kezdesý 2011 jyly uıymdastyryldy. 3 maýsymda qazaqstandyqtar Sergeı Grıdınniń dýbli arqasynda elordada 2:1 esebimen jeńiske jetse, 2011 jyldyń 6 qyrkúıeginde Bakýde ótken qarymta matchta bizdiń fýtbolshylar 3:2 esebimen jeńilip qaldy. Qazaqstan quramasynan Sergeı Ostapenko men Vıtalıı Evstıgneev mergendigimen kózge tústi. Ulttyq quramada alǵashqy oıynyn ótkizgen Evstıgneev 77-mınýtta alańǵa shyǵyp, birinshi soqqysymen-aq qarsylas komandanyń qaqpasyn dál kózdegen edi.
Sondaı-aq Qazaqstan men Ázerbaıjan quramalarynyń joldary halyqaralyq týrnırlerde túıisti. Máselen, 2007 jyly Shymkentte uıymdastyrylǵan «Alma-TV» kýbogynyń fınalynda eki eldiń quramasy kezdesip, matchtyń sońǵy mınýttarynda Andreı Fınonchenkonyń soqqan golynyń arqasynda jerlesterimiz 1:0 esebimen jeńip ketti.
Qazaqstan men Ázerbaıjan quramalary Eýropa chempıonattary men basqa da halyqaralyq týrnırler sheńberindegi kezdesýlerden bólek, taǵy da úsh márte joldastyq match ótkizdi. 2008 jyly 3 aqpanda Túrkııanyń Antalııa qalasyndaǵy oıynda qarsylastar bir-biriniń qaqpasyna gol soǵa almady. Eki eldiń taǵy bir joldastyq matchy 2016 jyldyń 26 naýryzynda Túrkııanyń Belek qalasynda ótti. Oıyn aldynda Qazaqstan quramasyn birqatar debıýtant fýtbolshylar tolyqtyrdy. Olardyń arasynda Vladımır Plotnıkov, Almır Mýhýtdınov, Erkebulan Tuńǵyshbaev, Roman Mýrtazaev jáne Jasulan Moldaqaraev boldy. Bul joly qazaqstandyqtar jyldam gol soǵyp, jeńiske jetti. Kezdesýdiń 8-mınýtynda Maqsat Baıjanov Kamran Agaevtyń qaqpasyna baspen gol soqty. Esep – 1:0.
Qazaqstan men Ázerbaıjan arasyndaǵy matchtar tarıhy ázirge 2018 jyldyń 5 maýsymynda elordada ótken joldastyq kezdesýmen qorytyndylanyp tur. Bul oıynda Stanımır Stoılov shákirtteri Roman Mýrtazaev, Serikjan Mujyqov jáne Baqtıer Zaınýtdınovtyń soqqan goldarynyń arqasynda iri eseppen jeńiske jetken-di – 3:0. О́kinishke qaraı, sol oıynda jarqyn ónerimen kózge túsken Baqtıer Zaınýtdınov pen Serikjan Mujyqov jaraqattaryna baılanysty juma kúni ótetin matchta ulttyq quramaǵa kómektese almaıtyn boldy.
