Osy oraıda Memleket basshysy Qasym-Jomart Toqaevtyń Ulttyq ǵylym akademııasynyń saltanatty sessııasynyń jumysyna qatysýy ǵylymı qaýymdastyqty bir serpiltip tastady deýge negiz bar. О́ıtkeni kópten kútken kezdesý ǵalymdardy tolǵandyrǵan kóptegen túıtkildi máseleniń sheshimin tabýyna múmkindik berdi.
Ulttyq ǵylym akademııasy memlekettik mártebesinen aıyrylyp, qoǵamdyq uıym deńgeıine tómendep ketkennen keıin, ǵylymdy damytýdyń burynǵy qalyptasqan júıesinen múlde aýytqyp ketti. Saldarynan ǵylymdy qarjylandyrý, básekelestik, ǵylymdy jarııalaý, óndiristi tájirıbe júzinde iske asyrý jaǵynyń álsirep ketkeni jasyryn emes. Osy oraıda ǵylymı kadrlar áleýetiniń joǵary ekenin nazarǵa alatyn bolsaq, Prezıdenttiń akademııaǵa memlekettik mártebe berip, bıýdjet esebinen qarjylandyrý máselesin kóterýi otandyq ǵylym salasynyń aldynda úlken belester turǵandyǵyn kórsetedi.
Aıta ketetin mańyzdy bir másele, Prezıdenttiń Bilim jáne ǵylym mınıstrligin eki vedomstvoǵa bólý týraly usynysy ǵylymdy keshendi damytýǵa, onyń básekege qabilettiligin qamtamasyz etýge barynsha kóńil bólgendiginiń aıǵaǵy. Bul salalyq vedomstvolardyń jeke-jeke qarjylandyrylýyna, budan ári qaraı kadr daıyndaý, álemdik ǵylym salasynyń bazasyna ený sııaqty keshendi mindetterdiń iske asýyna yqpal etetin bolady.
Memleket basshysy sonymen birge ǵylymı-zertteý jumystarynyń sapasyn arttyrýǵa toqtalyp, Ulttyq dáıeksóz alý júıesin qurý qajettigin alǵa tartty. Mundaı qadam otandyq ǵylymı jýrnaldardyń áleýetin arttyrýǵa, álemdik ındeksterge tirkelý jaǵyna kóńil bólýge múmkindik beretini sózsiz. Osyǵan qaraǵanda, ulttyq ǵylymdy damytý óziniń klassıkalyq júıesine jaqyndaı túsetini anyq. Qoǵamdyq-gýmanıtarlyq ǵylymdardy, ıaǵnı qazaq ádebıeti, ólketaný, tarıhty, tildi damytý máselesindegi asqaraly mindetter otandyq ǵylymdy damytyp, ulttyq múddege qyzmet etýge, básekege qabilettilikke jol ashady degen senim zor.
Kenjehan MATYJANOV,
M.Áýezov atyndaǵy Ádebıet jáne óner ınstıtýtynyń dırektory,
fılologııa ǵylymdarynyń doktory, UǴA korrespondent-múshesi
