Memleket basshysy Nursultan Nazarbaev Almatydaǵy Kıeli Voznesenıe kafedraly soboryna bardy, dep habarlady Prezıdenttiń baspasóz qyzmeti.
Shirkeýdi aralaý barysynda Memleket basshysy dindarlar qaýymy aldynda sóz sóılep, olardy Pasha merekesimen quttyqtady.
– Bıylǵy mereke pravoslavıelikter men katolıkterdiń ony bir kúnde atap ótýimen erekshe. Bul – barsha qazaqstandyqtar úshin ortaq mereke, óıtkeni, elimizde barlyq dinniń teńdigi qamtamasyz etilgen. Bizdiń halqymyz Pasha men Rojdestvony, Naýryz ben Qurban aıtty birge atap ótedi, bul búginde dástúrge aınaldy. Dinderdiń ózgesheligi barsha Qazaqstan halqyn biriktirýshi faktor bolyp sanalady, kóptiń kóńiline senimdilik, tynyshtyq, tatýlyq pen kelisim uıalatady. Dál osy arqyly biz eldi damytyp, azamattarymyzdyń ál-aýqatyn jaqsartyp, balalarymyzdy ósiremiz jáne bolashaǵymyzǵa senimmen qaraı alamyz, – dedi Qazaqstan Prezıdenti.
Nursultan Nazarbaev qazaqstandyqtar toleranttylyq pen bir-birine degen ózara syılastyqty qylaýsyz saqtaýy tıis ekenin atap ótti.
– Pashany merekeleý úlken úmitpen ushtas. Men bizdiń ortaq úmitimiz barshamyzdyń alańsyz eńbek etip, balalardy tárbıeleı alýymyz úshin elimizde báriniń turaqty bolýyna saıady dep oılaımyn, – dedi Qazaqstan Prezıdenti.
Sóziniń sońynda Memleket basshysy hrıstıandarǵa jáne barsha Qazaqstan halqyna mol ıgilik, zor densaýlyq, ár shańyraqqa baq-bereke tiledi.
О́z kezeginde Astana jáne Qazaqstan Mıtropolıti Aleksandr soborǵa kelip, pravoslavıe hrıstıandaryn Pashamen quttyqtaǵany úshin Nursultan Nazarbaevqa alǵys aıtty.
– Siz danalyqpen aıtqandaı, bul – barsha qazaqstandyqtardyń merekesi, óıtkeni, Siz birlik, tatýlyq jáne kelisim saıasatyn júrgizip kelesiz. Qazaqstan turǵyndary Sizdiń búkil halyqtyń ıgiligi úshin etken eńbegińizdi óte joǵary baǵalaıdy, – dedi Mıtropolıt.
Dástúr boıynsha Mıtropolıt Memleket basshysyna Pasha merekesine arnaıy ázirlengen jumyrtqany usyndy.
-----------------------------------------
Sýretterdi túsirgender
S.BONDARENKO, B.OTARBAEV.
