Júldegerler Qorqyt ata atyndaǵy ýnıversıteti, S. Amanjolov atyndaǵy ShQÝ, H. Dosmuhametov atyndaǵy Atyraý ýnıversıteti, Turan ýnıversıteti, Satbayev University jáne Narhoz ýnıversıtetiniń grant ıegerleri atandy. Sondaı-aq týrnırlerge qatysqany úshin jastar gramotalarmen, kýboktarmen jáne 200 myńnan 500 myń teńgege deıin aqshalaı syılyqtarmen marapattalady.
Bilim jáne ǵylym mınıstrligi debat qozǵalysyn keńinen nasıhattaý boıynsha belsendi jumys júrgizip keledi. Búgingi tańda elimizde 120 944 adamdy qamtıtyn 6 778 debat klýby bar. Olardyń arasynda oqýshylar da, stýdentter de bar.
«Elimizde oqýshylar men stýdentterdiń debat qozǵalysy belsendi túrde damyp keledi. Eki jyl buryn 4 405 mektep jáne stýdenttik klýbta 66 186 pikirsaıysshy bolsa, búginde olardyń sany 120 myńnan asty. Olar syndarly talqylaý ónerin úırenedi, basqa debatshylarmen dostyq jáne syılastyq qarym-qatynas ornatady, sondaı-aq olar oı-órisin keńeıtip, shyǵarmashylyq belsendilikterin arttyrady. Bıyl Balalar jyly aıasynda bes debat týrnıri uıymdastyrylady. Búgingi kúni onyń ekeýi ótkizildi. Olarǵa 500-ge jýyq oqýshy men stýdent qatysyp, kámeletke tolmaǵandardy oqytý, tárbıeleý jáne olardyń quqyqtaryn qorǵaýdyń mańyzdy máselelerin kóteredi. Pikirsaıys qozǵalysyn damytý maqsatynda Bilim jáne ǵylym mınıstrligi debat qozǵalysynyń jobalyq keńsesin qurdy. Bul qozǵalysty keńinen nasıhattaý maqsatynda áleýmettik jelilerde aqparattyq-túsindirý jumystary belsendi júrgizilip jatyr. Jańa mektepishilik debat klýbtary qurylyp, oblystyq jáne aýdandyq deńgeıde úılestirýshiler anyqtaldy, túrli kezdesýler, dóńgelek ústelder, vebınarlar ótkizilip jatyr», dep túsindirdi QR BǴM Respýblıkalyq qosymsha bilim berý oqý-ádistemelik ortalyǵynyń dırektory Raısa Sher.
Elimizde oqýshylardy debat ónerine baýlıtyn 100-den asa mamannan quralǵan tájirıbeli pikirsaıysshylar pýly quryldy. Sonymen qatar kolledjder men mektepterde debat klýbtaryna járdemdesý úshin stýdent desantshylar uıymdary jumysyn bastaǵan. Pedagogıkalyq joǵary oqý oryndarynyń barlyǵy eriktiler toptaryn ashyp, mektepterde trenıngter men sheberlik sabaqtaryn ótkizedi, týrnırlerdi uıymdastyrý kezinde volonterlik kómek kórsetedi.
Odan bólek, bıyl Respýblıkalyq oqý-ádistemelik ortalyǵy debat klýbtarynyń jetekshilerine qoldaý bildirý maqsatynda pikirsaıys mashyqtaryn damytý taqyryptarynda 35 vebınar ótkizdi. Olarǵa 3 myńnan astam adam qatysty.
Arýjan Amangeldi
