Ekonomıka • 07 Maýsym, 2022

Nesıeleý qaı deńgeıde?

2022 jylǵy sáýirdiń sońynda bankterdiń ekonomıkany nesıeleý kólemi 19,3 trln teńgege jetken. Zańdy tulǵalarǵa berilgen nesıe kólemi sońǵy aıda 0,5 paıyzǵa tómendep, 8 016,1 mlrd teńge bolsa, jeke tulǵalarǵa berilgen kredıt 1,9 paıyzǵa artyp, 11 383,4 mlrd teńgeni qurady.

Abaı QAZBEKULY

Ulttyq banktiń habarlaýynsha, tól valıýtamen berilgen nesıe kólemi sáýirde 1,6 paıyzǵa ósip, 17 637,6 mlrd teńgeni quraǵan. Onyń qurylymyndaǵy zańdy tulǵalar nesıesi – 1 paıyzǵa, jeke tulǵalar nesıesi 2 paıyzǵa artqan. Sheteldik valıýtamen berilgen zaımdar 5,6 paıyzǵa azaıyp, 1 762,0 mlrd teńge bolǵan. Onyń qurylymyndaǵy zańdy tulǵalar nesıesi – 5,6 paıyzǵa, jeke tulǵalar nesıesi 11,9 paıyzǵa tómendepti.

«Bir aıda uzaq merzimdi nesıeler kólemi 0,5 paıyzǵa ulǵaıyp, 16 trln teńge boldy. Qysqa merzimdi kredıtter 3 paıyzǵa kóbeıdi – 3,3 trln teńge. 2022 jyldyń sáýirinde shaǵyn kásipkerlik sýbektilerin nesıeleý 10,9 paıyzǵa, 4 trln teńgege deıin tómendegen. Bul – korporatıvti sektorǵa berilgen nesıeniń 50,4 paıyzy. Banktik emes zańdy tulǵalarǵa teńgemen berilgen kredıtter boıynsha ortasha alynǵan syıaqy mólsherlemesi 15,2 paıyzdy, jeke tulǵalarǵa 17,3 paıyzdy qurady», delingen Ulttyq bank habarlamasynda.

Osyǵan deıin Senat tóraǵasy Máýlen Áshimbaev bazalyq mólsherlemeniń joǵary bolýy ekonomıkany nesıeleýge kedergi keltiredi dep málimdegen edi.

«Qazaqstanda ekonomıkany nesıeleý deńgeıi ishki jalpy ónimniń 25 paıyzyn qurap otyr. Kóptegen damýshy elde bul kórsetkish 60-70 paıyz deńgeıinde. Sıngapýr, Koreıa sııaqty elderde tipti 150 paıyzǵa jetken. Biz sońǵy jyldary ekonomıkany nesıeleýge qysym jasap jiberdik. Buǵan bazalyq mólsherlemeniń 14 paıyz bolýy da áser etedi. Bul búginde Úkimettiń ınflıasııany tejeýdiń negizgi tetigi ekenin túsinemiz. Ári qaraı ne bolady? Eger syrtqy táýekelder saqtalar bolsa biz joǵary mólsherlememen ekonomıkamyzdy damyta almaımyz», degen edi M.Áshimbaev.

Ulttyq bank tóraǵasy Ǵalymjan Pirmatovtyń aıtýynsha, ekonomıkany nesıeleý tek mólsherlemege baılanyp turǵan joq.

– Bizdiń pozısııa – nesıelerdi memlekettik aqsha esebinen sýbsıdııalaýdy toqtatý. Jeke sektordy qoldap, kommersııalyq arnaǵa túsirý qajet. Tipti mólsherleme tómendegen kúnniń ózinde bankter kommersııalyq jobalardy aqsha qunynan tómen nesıelemeıdi. Bizge qurylymdyq reforma kerek. Bizdiń ekonomıka ımportqa táýeldi, sonyń ishinde azyq-túlik turǵysynan. Qazir syrtqy jáne maýsymdyq shokqa tap bolyp otyrmyz. Ulttyq bank sońǵy birneshe jyl boıy ekonomıkany qoldaý baǵdarlamalaryna belsendi qatysty, endi odan josparly túrde kete bastaıdy, – dedi Ǵ.Pirmatov.

Kúnniń mańyzdy jáne ózekti jańalyqtaryn «Egemen Qazaqstan» telegram kanalynan oqyńyz