Edil Teshebaevtyń týǵan jeri Saryaǵashtaǵy úıinde janazaǵa jınalǵan adam qarasy kóp. Asylyp qalǵan kúıi tabylǵan sarbazdyń denesi 6 maýsymda jetkizilgen.
«Úsh adamǵa úsh túrli aıtyp otyr. Birinshi, pyshaqtady deıdi, artynsha balasyna báteńkeniń baýyna asylyp qaldy deıdi. Endi kep anasyna podpolkovnık beldigine asylyp qaldy degen», deıdi marqumnyń apasy Gúljámılá Altynbekova.
«Bireýden bes myń suraǵan eken. Ol aqshanyń bárin neǵyla beredi dedim. Sol kezde 5 myń atańa nálet dep, salyp jiberýim kerek edi. Oılamadym ǵoı, mundaı bolady dep, demek, balamnan aqsha suraǵan. Aqsha bermegennen keıin uryp óltirgen de. Basqa nesi bar. Asylyp qaldy deıdi, balam asylmaǵan. Kózim jetedi oǵan. Bular óltirip alyp, sodan keıin jala jaýyp otyr», deıdi ákesi Baqyt Altynbekov.
Istegi túsiniksiz jaıttardy marqumnyń dostary da aıtyp otyr. Toǵyz aı qyzmette júrgen sarbaz otbasynyń jaǵdaıyna baılanysty ólgisi keletinin jaza bastaýy aqylǵa qonbaıdy, deıdi olar. Olardyń pikirinshe, sarbaz jazdy degen sońǵy hattaǵy mátin de bir ǵana adamnyń qolymen jazylmaǵan.
«Ár hatta ártúrli jazylǵan. Maǵan jazylǵan hatta basqasha jazylǵan, mamasyna jazylǵan hatynda jazýy múldem basqasha. Ekeýin eki adam jazǵan. Onyń jazýy sál nasharlaý edi. Tipti dápterge jazǵanda alfavıttiń arasynda "y", "i" degen áripti jazbaı tastap ketýshi edi, bir eki áripti. Al bul jerde hatta "y", "i" áripteri bylaı tursyn, útir-núktege deıin mánerlep jazylǵan. Edil olaı jazbaıdy», deıdi marqumnyń dosy Ersultan Qanjigit.
Ulynyń denesin Aqtaýdan alyp kelgen anasy Edildiń shaty kógerip ketkenin aıtady. Medısına salasynda istegen ol ulynyń qasaqana óltirilgenine senimdi.
«Men ózim hırýrgııada istegem ǵoı, biz de máıithanadan adam shyǵarǵanbyz. Ol denesinen jylý ketkennen keıin moıny, barlyq jeri qatyp qalady, qımyldamaıtyn. Munyń moıny, omyrtqalary ana jaqqa, myna jaqqa aınalyp jatyr. Ony ádeıi óltirgen negizi, sóıtken de, ózi darǵa asyldy qyla salǵan», deıdi marqumnyń anasy Naǵıma Nurbaıqyzy.
Al sarbazdyń máıitin jetkizgen áskerı bólimniń komandıri keshirim retinde mıllıon teńge ákelgenin aıtqan. Biraq marqumnyń jaqyndary óre túregeldi. Qazir tergeý júrip jatqanyn aıtqan basshy «Edil jıi esinen tanyp qala beretin» deıdi.
«Armııaǵa kelgennen beri aýa jetpeı esinen tanyp qalatyn. Toǵyz aı boıy emes, osy sońǵy aıda ma, sol kezde bir ret ketti. Esinen tandy, odan keıin Aqtaýǵa gospıtalǵa ketti, emdeldi», deıdi QR UQK shekara qyzmeti basqarmasy bastyǵynyń mindetin atqarýshy Asqar Aıaǵanov.
Telearna tilshileriniń aıtýynsha, qazir áskerı tergeý basqarmasy shekarashynyń ólimi boıynsha qylmystyq is qozǵap, arnaıy tekserýdi bastady. Biraq bul týraly ne Qorǵanys mınıstrligi, ne shekara qyzmetindegiler resmı aqparat bergen joq.
Eske salaıyq, 4 maýsymda Mańǵystaý oblysyndaǵy shekara qyzmetinde merzimdi qyzmettegi sarbazdyń ólimi habarlanǵan edi. Ol sýısıd jasady delindi.
Bul jaǵdaıǵa qatysty Prezıdent te pikir bildirgen. Edil Teshebaevtyń ólimi habarlanǵan kúni Qasym-Jomart Toqaev áskerdegi ólim sebepterin tergeý jónindegi arnaıy komıssııa qurýdy jáne bolashaqta mundaı jaǵdaıdyń aldyn alýdy tapsyrǵan.
6 maýsymda Qorǵanys mınıstrligi ókilderi «áskerdegi ólimge jol bermeý» boıynsha baǵdarlama ázirlenip jatqanyn habarlady.
