Grant bergen joǵary oqý oryndary arasynda Qorqyt ata atyndaǵy Qyzylorda ýnıversıteti, S.Amanjolov atyndaǵy Shyǵys Qazaqstan ýnıversıteti, H.Dosmuhamedov atyndaǵy Atyraý ýnıversıteti, Turan ýnıversıteti, Satbayev University jáne Narhoz ýnıversıteti bar. Sondaı-aq jastar saıystarǵa qatysqany úshin gramotalarmen, kýboktarmen jáne 200 myńnan 500 myń teńgege deıin aqshalaı syılyqtarmen marapattalady. Bilim jáne ǵylym mınıstrligininiń málimdeýinshe, búgingi tańda elimizde 120 944 oqýshy men stýdentti qamtıtyn 6 778 debat klýby bar.
Respýblıkalyq qosymsha bilim berý oqý-ádistemelik ortalyǵynyń dırektory Raısa Sher elimizde jastardyń debat qozǵalysy belsendi túrde damyp kele jatqanyn jetkizdi.
«Eki jyl buryn 4 405 mektep pen stýdenttik klýbta 66 186 pikirsaıysshy bolsa, búginde olardyń sany 120 myńnan asty. Klýb músheleri syndarly talqylaý ónerin úırenedi, basqa debatshylarmen dostyq jáne syılastyq qarym-qatynas ornatady. Sonymen qatar olar oı-órisin keńeıtip, shyǵarmashylyq belsendiligin arttyrady. Bıyl Balalar jyly aıasynda bes debat týrnıri uıymdastyrylmaq. Qazirgi tańda onyń ekeýi ótkizildi. Oǵan 500-ge jýyq oqýshy men stýdent qatysyp, kámeletke tolmaǵandardy oqytý, tárbıeleý jáne olardyń quqyqtaryn qorǵaýdyń mańyzdy máselelerin kótergen bolatyn», dep habarlaıdy.
Atalǵan mınıstrliktiń deregine súıensek, oqýshylardy debat ónerine baýlıtyn tájirıbeli pikirsaıysshylar pýly qurylǵan. Pýl 100-den asa mamannan turady. Al kolledjder men mektepterde, pedagogıkalyq joǵary oqý oryndarynda debat klýbtaryna kómektesý úshin stýdent desantshylar, eriktiler toby jumys istep jatyr. Olar mektepterde trenıngter men sheberlik sabaqtaryn ótkizip, týrnırlerdi uıymdastyrý kezinde volonterlik kómek kórsetpek.
Arýjan NAǴAShYBAI,
L.N.Gýmılev atyndaǵy Eýrazııa Ulttyq ýnıversıtetiniń stýdenti
