Jeke qosalqy sharýashylyqtarǵa arnalǵan jaıylymdardy halyqqa qaıtarý aýyl sharýashylyǵy taýaryn óndirýshiler, aýyl ákimderi jáne jergilikti qoǵamdastyq arasyndaǵy memorandým aıasynda júzege asyrylyp otyr. Dál osyndaı memorandýmdarǵa Jambyl oblysynyń Baızaq aýdanynda da qol qoıyldy. Aldaǵy ýaqytta amanattyqtar mundaı tájirıbeni búkil elimiz boıynsha engizýdi josparlap otyr.
Túımekent aýylynyń turǵyny Aıdar Imanbaevtyń aıtýynsha, partııalyqtar halyq pen bıznes arasyndaǵy kópirge aınalyp, túıtkildi máseleniń syndarly sheshimin usyndy.
«Aýlada jeke maldy jaıý máselesi elimizdiń barlyq óńirinde ózekti. Búginde jaıylym tapshylyǵy shamamen 22 mln gektardy quraıdy. Osy máseleni jedel sheshý maqsatynda Amanat partııasy bir apta ishinde aýyl turǵyndaryna ýaqytsha paıdalaný úshin aqysyz negizde jer berý boıynsha jergilikti atqarýshy organdarmen jáne iri sharýa qojalyqtarymen jumys júrgizdi», dedi partııa hatshysy Eldar Jumaǵazıev.
Ol máseleni júıeli túrde sheshý úshin partııa qoldanystaǵy zańnamaǵa ózgerister engizýge áreket jasaıtynyn aıtty. Atap aıtqanda, jaıylymdardyń tozýyna jáne shóleıttenýine qarsy kúres jónindegi bıýdjettik baǵdarlamany oblystyq deńgeıden aýyldyq okrýgter ákimderiniń deńgeıine berý, mal basyn eskere otyryp, jaıylymdardyń jalpy alańyna túsetin júkteme normalaryn jańartý, eldi meken shekarasynan 5 km radıýsta aýyl sharýashylyǵy taýaryn óndirýshilerge jaıylym berýge tyıym salý jáne t.b. qajet.
