Halqy tyǵyz ornalasqan aýyldyń demografııalyq ósimi de jaqsy. Sondyqtan oqýshylar úshin mektep máselesi qashan da ózekti. Bilim nysanynyń qosymsha ǵımaraty ábden tozyp, qabyrǵasynan jylý ketse de áli paıdalanyp otyr.
Bul ǵımarat ótken ǵasyrdyń 70-jyldary jumysshylarǵa arnap salynǵan jataqhana edi. Bala sany artqasyn eki myńynshy jyldary mektep kabınetterine laıyqtalyp, jabdyqtaý isi júrgizilgen. Apatty jaǵdaıda dep turǵyndar alańdaǵanmen bul nysanda 100-den astam bala oqyp júr.
«Ajary qashqan eski nysannyń ekinshi qabaty adam ómirine qaýip tóndirgesin esigine qulyp qoıyldy. Biraq birinshi qabatynda bastaýysh synyp oqýshylary áli de oqyp jatyr», deıdi turǵyndar.
Shatyrynan sý ketip, qabyrǵasy qaqyrap turǵandyqtan ata-ananyń kóńiline alań kirdi.
Aýdandyq adamı áleýetti damytý bóliminiń ókilderi eski nysannyń kúrdeli jóndeý jumystaryna qarjy qaralǵanyn kútip otyrmyz deıdi. Turǵyndardyń talaby eskerilip, eski ǵımaratta bala oqytý toqtatylypty.
«Aldynda syımaǵan kezde oqyp jatqan. Qazir endi kúrdeli jóndeýden ótkizemiz dep jobalaý-smetalyq qujattaryn daıyndadyq. Smetalyq qujatqa oblystan qarjy surattyq. Qarjy berilgen jaǵdaıda kelesi jyly kúrdeli jóndeýden ótedi. Sodan keıin paıdalanatyn bolamyz», deıdi Keles aýdandyq adamı áleýetti damytý bóliminiń basshysy Baqtııar Ábdıev.
Irgesi quıylyp, qurylysy aıaqtalsa qos aýyldyń oqýshy syıymdylyǵy sheshimin tabady dep otyr. Al oqýshylar oǵan deıin úsh júz oryndyq mektepte úsh aýysymmen oqýyna týra keledi.
