Ulttyq quryltaı ǵasyrlar boıy Qazaqstannyń sheksiz dalasynda qalyptasqan demokratııalyq baǵyttyń tarıhı jalǵasy bolatyny sózsiz. Sebebi yqylym zamannan beri quryltaı tek qazaqtardyń ǵana emes, kóshpeli halyqtardyń onyń ishinde túrki jáne mońǵol taıpalarynyń ómirindegi qoǵamdyq qubylys boldy. Shyn mánisinde quryltaı – orta ǵasyrlardaǵy Eýropalyq Parlamenttiń balamasy, halyqtyń ókildi organy.
Prezıdenttiń pikirinshe, qazirgi quryltaı bılik pen halyq arasyndaǵy ózara is-qımyldy kúsheıtý úshin qoǵamdyq dıalogtyń biryńǵaı ınstıtýsıonaldyq modelin qalyptastyrýǵa tıis.
Qoǵam qaıratkerlerinen, ǵalymdardan, bıznes qoǵamdastyqtan, azamattyq qoǵam jáne saıası partııalar men QHA ókilderinen quralǵan, sonymen qatar óńirlik Qoǵamdyq keńes músheleri kirgen Ulttyq quryltaıdyń qýatty quramy uzaqmerzimdi jáne asa mańyzdy memlekettik qoǵamdyq-saıası máselelerdi sheshýge kúsh biriktirip otyrǵanyn atap ótken jón.
Ulttyq quryltaı qurý – bul óte úlken oqıǵa jáne onyń alǵashqy otyrysyn Ulytaýda ótkizý Prezıdenttiń tarıhı-ıdeologııalyq turǵydaǵy eń qýatty qadamy.
Jalpy quryltaı ıdeıasy túrli deńgeıdegi qazaqstandyq elıtany, solar arqyly búkil halyqty biriktirýge baǵyttalǵan. Bul saıası ınstıtýt ǵasyrlar boıy synalǵan jáne qazirgi jaǵdaıda ózin-ózi basqarý dyń kommýnıkatıvti tetigi sanalady. Ol bir jaǵynan bılik pen halyqty keri baılanyspen qamtamasyz etedi, ekinshi jaǵynan azamattarǵa el basqarý isine aralasýǵa múmkindik beredi. О́z kezeginde bul qazaqstandyqtardyń óz-ózin tanýy men jaýapkershiligin arttyrýǵa negiz bolady. Bul toqyraýǵa qarsy turý jáne damýǵa bet burý úshin qazirgi qoǵamǵa asa qajet qadam.
Eger biz qoǵamdy naqty transformasııalaý men jańǵyrtý, patrıotızmge tárbıeleý men jańasha oılaýdy qalyptastyrý týraly aıtatyn bolsaq, onda áleýmettik lıft pen memlekettik qyzmetke qoljetimdilikti arttyrýǵa tıispiz. Sonda jergilikti jerlerde el bolashaǵy úshin aıanbaıtyn kóshbasshylar shoǵyry qalyptasady. Olar Qazaqstannyń ıgiligi men múddesi úshin ter tógedi.
Ulttyq quryltaı – saıası ǵana emes, el taǵdyryna yqpal etetin rýhanı qural. Bizge, qazaqstandyqtarǵa tarıhı múmkindikti múlt jiberip almaý qajet. Bizdiń ata-babalarymyz jalpyhalyqtyq deńgeıde talaı ret taǵdyrsheshti sheshim qabyldaǵan. Bizdiń mindetimiz – olardyń ósıetin oryndaý. Biz babalarymyzdan murasyn saqtap, jańa jáne jaqsy dúnıe jasaı alatynymyzǵa senemin.
Ermuhamet ERTISBAEV,
Qazaqstan Halyq partııasynyń tóraǵasy
