Birligi bekem aýyl

Mereıtoı qarsańynda aýyl ishi jáne mazarat mańaıy kúl-qoqystan muqııat tazalandy. Ishki joldardyń tabanyna qıyrshyq tas tóselip, oı-shuń­qyry tegistelip, birqatary kúr­deli jóndeýden ótkizildi. Osy aýqymdy istiń barlyǵy ón­diriste jumys isteıtin aýyl azamat­tary­nyń jeke bastamalary boıynsha júzege asyryldy.

Atap aıtqanda, jaqsy istiń jarshysy, bastamashysy bolǵan Serǵazy Túıte, Álfarabı Stam­qulov, Temirjan Isın syndy atpal azamattar bul iske bilek sybana kirisip, halyqty jumylýǵa úndedi. Olardy qoldaǵan aýyl turǵyndary Meı­ram Jábdik, Amanǵazy Stam­qulov, Maral Oryn­bekov, Aldan Jaqsylyqov jigerli jastardy ıgilikti isterge bastady.

Sonymen 25 mamyr «Baq mekenim – Baqty» aýyl kúni bolyp belgilenip, qurylǵanyna 60 jyl tolyp otyrǵan aýyl mere­kesin ótkizý bastamasy osylaısha kóterilgen edi. Týǵan ólkeni kórkeıtý, áleýetin arttyrý, máde­­nıetin damytý syndy izgi is-shara­lar qolǵa alyndy.

Mundaı úlken sharýaǵa qo­maqty qarjy kerek ekeni belgili. Bul máseleni aýyl azamattary ózderi sheship, árkim shama-shar­qynsha bul iske úlesin qosty. So­nyń nátıjesinde, mereıtoıdy ótkizýge jetkilikti qarjy jı­naldy.

Is-sharany ótkizý qamyna kiris­ken belsendi top áp-sátte toı baǵ­darlamasyn jasap ta tas­tady. Eń aldymen, aýyldyń ishki-syrtqy tazalyǵy qolǵa alyn­­dy. Bul iske «Kentóbe» keni­­shinde, «Qazaqmys» korpo­rasııa­synda, «Qarmys», «Baı­batyr» kompanııalarynda eń­bek etetin aýyl azamattary bi­ri­gip, belsene kiristi. Azǵana ýaqyttyń ishinde birneshe mıllıon teńgeniń aýqym­­dy jumysy atqaryldy. Bá­ri­nen buryn aıtarymyz, osy ju­mys­tardy at­qarǵan azamattar qarjy, ja­nar-jaǵarmaı shy­­ǵyndaryn óz moıyndaryna alǵan edi.

Sonymen qatar ár jyldary mektep bitirgen túlekter aýyl úshin izgi isterge bastamashy bola bas­tady. Atap aıtsaq, aýyl qaq­pasyn turǵyzý mekteptiń 36-shy túlekteriniń uıymshyldyǵy men eren eńbekteriniń arqasynda iske asty. Bul sharýanyń basy-qasynda aýyl azamaty Maq­sut Nur­ǵalıev júrdi. Sondaı-aq «Baq mekenim – Baqty» áni jazylyp, oǵan qazirgi ýaqytta AQSh-ta turatyn aýyl týmasy Nurlan Sarbasov demeýshilik jasady.

Toı ótkizý barysynda bezen­dirý isimen aınalysqan dızaıner, aýylymyzdyń túlegi Baıan Jábdikovanyń eńbegin de atap ótýge bolady. Jalpy alǵanda, or­taq iske tartylmaı qalǵan adam bol­mady. Jas­tar­dyń jankeshti eń­begimen qatar, sabaqtan tys ýa­qytta oqý­­­shylardyń da tazalyq ju­­my­sy­na qatysqanyn aıtqan lázim.

Baqty aýylynyń 60 jyl­dyq mereıtoıy aıasynda dúnıe­den ótken kisilerge Quran baǵysh­talyp, aýyl qaqpasynyń sal­ta­natty ashylý rásimi ótti. Bul sal­­tanatta aýyl ákimi Aq­qalı Seıt­­­hazın quttyqtaý sóz sóılep, aýyl aqsaqaly Tileý­qabaq Oryn­bekov bata berdi.

Mereıtoıdyń kórigin Qarqa­raly mádenıet bóliminiń qyz­metkerleri, aýylymyzdyń týmasy Erkebulan Qanatuly zaıyby ekeýi qyzdyra tústi. Áýelegen ásem án, kúmbirlegen qońyr kúı kóńildi kótere túskeni anyq. Toı ústinde aýylymyzdyń týmasy, belgili aqyn Mıras Asannyń sózine jazylǵan «Baqty meke­nim» ániniń tusaýkeseri bolyp, jurtshylyq ol týyndyny jyly qabyldady. Shyǵarmanyń ánin belgili sazger, balqantaýlyq Aman­geldi Ahmetjanov shy­ǵarsa, oryndaýshysy Baqty­dan shyqqan belgili ánshi Sáken Omarov boldy.

Ulttyq sport túrlerinen ót­ken saıystar merekelik is-shara­lar­dyń qyzyǵyn eseledi. «Arqan tartý» saıysy komandalyq júıede ótkizilip, jeńisti aýyl ko­mandasy julyp aldy. «Qoı kó­terý» saıy­synda qoıdy 55 ret kótergen aýyl balýany Ol­jas Ázimbaev jeńiske jetti. Uldar jáne qyzdar arasyndaǵy júgirýden jarys ta óte qyzyqty ótip, jeńimpazdy oblystyq «Sa­ry­­arqa» telearna­synyń jýr­nalısi, aýyl azamaty Maqsat Beı­senaev jeke óz atynan 50 myń teńge júldemen marapattady. «Serke kóterý» saıysy da óte qyzyqty ótti. Bul synda da aýylymyzdyń týmasy Dos Ábil­mansur eshkimge des bermedi.

Sonymen el asyǵa kútken at jarysyna da kezek kelip jet­ti. «Taı jarysy», «Qunan báı­ge» synynyń árqaısysynda jıyr­ma-jıyr­madan júırikter baq sy­nady. Bes orynǵa júlde tigi­­­lip, bas báıgege motosıkl berildi.

Al jurttyń delebesin qoz­dyrǵan «Alaman báıgede» ár qıyr­dan kelgen 28 sáıgúlik synǵa tústi. Báıgeniń 21 shaqy­rymnan turatyn qashyqtyǵynda máre syzyǵyn Osakarov aýda­nynyń aty birinshi bolyp qıdy. Je­ńim­pazǵa júldeni mektep bitir­genderine 45 jyl tolǵan tú­lekter atynan aýyl muǵalimi Bo­lat Táńirbergenuly tapsyrdy.

Mine, osyndaı aıtýly is-sha­rany bereke-birligi jarasqan aýyl halqy óz kúshimen atqaryp shyq­ty. Mereıtoıǵa elimizdiń ár qıy­rynan kelgen meımandar aıa­­daı ǵana aýyldaǵy aǵaıynnyń yn­­tymaqty tirligine bek rıza bol­­­dy dep senimmen aıtýǵa bola­dy.

Bolat ASAN,

Qazaqstan Respýblıkasy Bilim berý isiniń úzdigi,

Y.Altynsarın medaliniń ıegeri

Qaraǵandy oblysy,

Qarqaraly aýdany,

Baqty aýyly