Oblystyq onkologııa dıspanseriniń dırektory Elmıra Saparovanyń málimetine súıensek, byltyr qaterli isikpen aýyrǵan 1 063 naýqas tirkelgen. Onkologııalyq aýrýlardyń joǵary kórsetkishi Maqat, Qyzylqoǵa, Inder aýdandarynda baıqalypty. Onyń ishinde ókpe ragy, sút bezi, kolorektaldi obyry basym bolyp tur. Asqazan obyry da asqynǵan. Jatyr moıny jáne sút bezi obyryn anyqtaý úshin áıelderdi skrınıngtik tekserý kórsetkishi sáıkesinshe, 92% jáne 94% quraǵan. Tekserýdiń nátıjesinde sút bezi obyrynyń 26, jatyr moıny obyrynyń 16, toq-
ishek qaterli isiginiń 5 jaǵdaıy erte satysynda anyqtalypty.
– Onkologııalyq aýrýlardan ólimniń tómendeýi 100 myń turǵynǵa shaqqanda 74 paıyzdy quraıdy. Jyl basynan beri qaterli isikpen 241 naýqas tirkeldi. Bul ótken jylmen salystyrǵanda 29 naýqasqa azaıyp, aýrý kórsetkishiniń dınamıkasy 11,9 paıyzǵa tómendedi, – dep málim etti E.Saparova.
Byltyr Atyraý oblysynyń 2021-2025 jyldarǵa arnalǵan áleýmettik-ekonomıkalyq damýynyń keshendi jospary qabyldanǵan edi. Oblystyq densaýlyq saqtaý basqarmasynyń basshysy Ashan Baıdýálıevtiń aıtýynsha, atalǵan jospar aıasynda 14 medısınalyq emdeý nysanyn ashý josparlanǵan. Qazir tórt nysannyń qurylysy júrip jatyr.
– О́ńirdiń densaýlyq saqtaý salasynda 35 mekeme bar. Onda 6 747 medısına qyzmetkeri turǵyndarǵa qyzmet kórsetedi. Atyraý qalasyndaǵy «О́rken», «Nursaıa» shaǵyn aýdandarynda №4 jáne №5 qalalyq emhanalarǵa qosymsha 250 adamdy qabyldaıtyn eki emhana qurylysyn salý josparlanyp otyr. Emhanalardyń jobalaý-smetalyq qujattary jasaqtaldy. Sondaı-aq 250 emdelýshige arnalǵan psıhıkalyq densaýlyq ortalyǵy salynady. Onyń qurylys jumystary osy jyldyń tórtinshi toqsanynda bastalady, – deıdi Ashan Baıdýálıev.
Onyń málimetine qaraǵanda, Atyraý qalasynda qurylysy bastalatyn jedel járdem stansasyn úsh podstansasymen salý jobasyna túzetý engizildi. Qazir jańa joba ishki aýdıt departamentinde saraptamadan ótkizilip jatyr. Jańa nysannyń qurylysyn úshinshi toqsanda bastaý kózdelip otyr. Al oblystyq onkologııalyq dıspanser janynan radıologııalyq korpýs salý úshin jobalyq-smetalyq qujatty daıyndaý qolǵa alynǵan.
Atyraý oblysy
