«Aldaǵy onjyldyqta Qytaı, Úndistan, Taıaý Shyǵys, Ońtústik jáne Ońtústik-Shyǵys Azııa memleketteri sııaqty dástúrli dostastyqtaǵy elder bizdiń aımaqtyń ekonomıkasynda iri ınvestorlar bola alady. Qytaı qazirdiń ózinde Qazaqstannyń negizgi ekonomıkalyq jáne syrtqy saýda seriktesi bolyp otyr. Bul el sońǵy 15 jylda bizdiń ekonomıkaǵa 21 mıllıard dollardan astam ınvestısııa saldy. Sondyqtan Qytaımen kópjaqty yntymaqtastyqty tereńdetý – bizdiń elimiz úshin asa mańyzdy mindet», dedi Qazaqstan Prezıdenti Peterbýrgtegi XXV halyqaralyq ekonomıkalyq forýmda.
Q. Toqaevtyń aıtýynsha, saıası sátter ǵana ózekti emes, alda bıznes-qurylymdar arasyndaǵy tikeleı baılanystardy kúsheıtý, jańa kólik-logıstıka dálizderin qurý mindeti tur.
«Alǵa bastaıtyn ınnovasııalyq-tehnologııalyq jobalar pýlyn jasaý, úzdiksiz kólik-logıstıkalyq tizbekterdi qurý, túptiń túbinde jahandyq ekonomıkanyń ósýi úshin jańa múmkindikter qalyptastyrý boıynsha birlesken kúsh-jigerdiń keleshegi bar», dedi Memleket basshysy.
