Fılmde kompanııanyń negizi qalanǵannan bastap búgingi kúnge deıingi tarıhy baıandalady. 2013 jyly resmı tirkelgen kompanııanyń qurylǵanyna bıyl 9 jyl tolyp otyr. Týyndy kompanııanyń qundylyqtary arqyly sýrettelgen. Árbir qundylyq aıasynda Bugin Holding quramyndaǵy kompanııa basshylary oılaryn aıtady. «Senim. Qurmet. Damý. Nátıje» qundylyqtary – derekti fılmniń negizi bolyp otyr.
Is-shara kompanııanyń negizin qalaýshylar Aıbek Qýatbaı men Nurbaqyt Juldyzbaıulynyń, ınvestor Baltabek Muqashev pen fılmniń prodıýseri Laýra Artyqbaevanyń alǵysózimen bastaldy. Ári qaraı fılmniń kórsetilimi bolyp, izinshe fılmde aıtylǵan faktiler negizinde kórermenge suraq qoıylyp, durys jaýap bergen qatysýshylarǵa syılyqtar tabystaldy.
«Bıyl bizge 9 jyl. On jyldyq dep arnaıy josparlaǵan joqpyz. Komanda soǵan pisip-jetilip daıyn boldy, iske kiristik te kettik. Keıingi kezde bizge kelip keńes suraıtyn jastar kóbeıip ketti. Fılm solarǵa shabyt bersin, motıvasııa bersin, keńes bolsyn degen maqsatta túsirildi. Ekinshiden, Bugin Entertainment komandasy joba istegisi keldi. Osydan bastańyzdar dedik. Nátıjesinde búgingi týyndy ómirge keldi. Aldaǵy ýaqytta osy komandamen fılm de, serıal da túsire alamyz dep aıta alamyn. Úshinshiden, bıyl bizde kóp jańalyqtar bolyp jatyr. Mektep ashyp jatyrmyz. Daryn.Online jobasy Qyrǵyzstan, О́zbekstan naryǵyna shyǵyp jatyr. Sonymen qatar Baltabek Qumaruly Muqashev aǵamyz bizge ınvestısııa salyp, strategııalyq serikteske aınaldy. Bul fılm – bir jaǵynan sonyń da bastamasy bolyp otyr. Osy sebepterge baılanysty búgin týyndynyń kórsetilimin jasadyq. Fılmdi kórý barysynda oıyma «mynaý shynymen de biz be?» degen suraq keldi», deıdi Bugin Holding kompanııasynyń negizin qalaýshylardyń biri Aıbek Qýatbaı.
Bugin Holding kompanııasy jobalarynyń keńesshisi Sadyq Sherimbektiń aıtýynsha, fılm kompanııanyń kópshilik aldynda bergen esebi ispetti.
«Bul is-sharany kompanııa retinde, komanda retinde bergen esebimiz dep bilý kerek shyǵar. Osy ýaqytqa deıin jyl saıyn ózimizshe esep jasap turatynbyz. Bul jolǵysyn fılm retinde jasaý kerek boldy. Ol úshin barlyq alǵysharttar qalyptasyp bitti dep oılaımyn. Jasalǵan jumystar bar. Aıta keteıin, bizde keıingi 3 jylda múldem tynym bolǵan joq. Qansha jerden motıvasııanyń bolsa da, energııań bolsa da, toqtaýsyz eńbek adamdy sál qajytqandaı bolady. Sol kezde bizge osyndaı serpilis kerek boldy. Bir jańaryp alýymyz kerek degendeı. О́tkenimizdi eske alyp...
Shyǵys halyqtarynda damý sıklmen júredi. Mysalǵa, bir núktege barý úshin, eń aldymen, kishigirim sheńber jasaısyz. Odan keıin sol núktege oralyp burynǵydan keńirek sheńber jasaısyz. Odan da keńirek dep jalǵasa beredi. Bizdiń búgingi fılm kelesi úlken sheńberdi bastaýdaǵy núkte boldy dep oılaımyn», deıdi ol.
