Nur-Sultan qalasyndaǵy Respýblıkalyq fızıka-matematıka mektebiniń ınformatıka muǵalimi Qýanysh Maǵaýın Apple kompanııasynyń Swift baǵdarlamalaý tili boıynsha sertıfıkattalǵan oqytýshysy atandy. Bul úshin ol Apple kýrstarynan ótip, emtıhandardy sátti tapsyrdy.
Osylaısha, Q.Maǵaýın qazaqstandyq muǵalimder arasynda alǵash bolyp tanymal IT kompanııanyń sertıfıkatyn ıelendi. Endi izdenimpaz pedagog álemniń úzdik ázirleýshileri bilim salasyndaǵy jańa jobalaryn tanystyratyn Apple Education eksklıýzıvti is-sharalaryna qatysa alady.
«Qazaqstanda qazir IT-ındýstrııa barlyq baǵytta, sonyń ishinde bilim berý salasynda da qarqyndy damyp keledi. Biz elektrondy oqýlyqtar men kúndelikter qoldanatyn, sondaı-aq emtıhandar men olımpıadalardy onlaın formatta ótkizetin sanaýly elderdiń qataryndamyz. Apple kýrstarynda Swift baǵdarlamalaý tili arqyly mobıldi qosymshalardy ázirleýdiń negizderin úırendik. Tálimgerler dáristi aǵylshyn tilinde ótkizdi. Meniń tobymda negizinen qosymshalardy ázirleýde mol tájirıbesi bar IT-mamandar oqydy. Al men toptaǵy jalǵyz muǵalim boldym. Barlyq emtıhandy tapsyryp, Apple oqytýshysy mártebesin alǵanyma qýanyshtymyn! Aldaǵy ýaqytta oqýshylarǵa arnalǵan mobıldi qosymshalar ázirleý boıynsha mektepte kýrstar ótkizip, áriptesterimmen alǵan tájirıbemdi bólispekpin», deıdi ınformatıka pániniń muǵalimi Q.Maǵaýın.
Pedagog Qýanysh Maǵaýınniń arqasynda Apple Authorized Training Center for Education (AATCE) mártebesi ózi jumys isteıtin mektepke de avtomatty túrde berildi. Endi Qýanysh Maǵaýın jumys isteıtin elordadaǵy Respýblıkalyq fızıka-matematıka mektebi Swift qosymshasyn jasaý boıynsha kýrstar ótkizip, oqýshylardy sertıfıkattap, oqý ornynda Apple classroom zerthanasyn ashý quqyǵyna ıe.
