Sáýleli dıagnostıka – densaýlyq kepili

Taıaýda kenshiler astanasyndaǵy oblystyq klınıkalyq aýrýhananyń terapevtik korpýsyn­da sáýleli dıagnostıka ortalyǵy saltanatty túr­de ashyldy. Memleket-jekemenshik áriptestigi negizinde ashylǵan Shipager medısınalyq ortaly­ǵyna joǵary dáldiktegi jáne joǵary tıimdi KT jáne MRT apparattary qoıylǵan. Aıta ketý kerek, mundaǵy zamanaýı tomograftar Qytaıdyń jetekshi medısınalyq jabdyq óndirýshisinen satyp alynǵan.

Bul apparattardyń múmkindigi óte joǵary. Mysaly, 64 tilimi bar KT apparatyndaǵy sáýlelený­diń tómen dozasy arqyly onkogematologııalyq aýrýlary bar pasıentter jan-jaqty tekserýden óte alady. Mamandardyń aıtýynsha, oblysta buǵan deıin mundaı múmkindik bolǵan emes.

Sonymen qatar baǵdarlamalyq jasaqtamaǵa pnevmonııadan keıingi taldaý qosylǵanyn da aıta ketken jón. Endi ókpeniń zaqymdanýy avtomatty túrde esepteledi. Sondaı-aq júrek tamyrlarynyń jaǵdaıyn dıagnostıkalaýǵa arnalǵan vırtýaldy koronarografııa baǵdarlamalary da bar. Munyń ózi jaqyn arada klınıkalyq aýrýhanada 30 oryndyq kardıologııa bólimshesin ashýǵa múmkindik beredi.

MRI 1,5 Tesla apparaty joǵary deńgeıde zertteý júrgizýge jáne sapaly egjeı-tegjeıli sýretter alýǵa qol jetkizdi. Baǵdarlamalyq jasaqtama jum­saq tinderdi de, ishki aǵzalardy da tekserýge múm­kindik beredi. Dárigerler ártúrli mólsherdegi isik­terdi erte kezeńderde anyqtaı alady: mundaı jaǵ­daı emdeý taktıkasyn ońaı basqarýǵa alyp keledi.

Shipager kompanııasynyń quryltaıshysy Denıs Podgaınov jabdyqtyń kez kelgen dene salmaǵy bar pasıentterge eseptelgenin aıtady.

– Mysaly, KT 250 kg deıin, MRT 200 kg deıin. Ortalyqta rentgen apparaty da bar. Maman­dar tolyqtaı daıyn, óıtkeni bul memleket-jeke­­menshik áriptestigi baǵdarlamasy negizinde ashyl­ǵan 10-shy ortalyq. Onda 12 dáriger jumys isteıdi. Zertteýlerdi qashyqtan sıpattaýǵa bolady. Son­dyqtan biz Qaraǵandy, Almaty jáne Máskeýden dárigerlerdi bul iske jumyldyrdyq, – deıdi ol.

Al Qaraǵandy oblystyq klınıkalyq aýrýha­na­synyń dırektory Erjan Nurbylaev búginde óńirde 27 tomograftyń jumys isteıtinin aıtady. Jyl sońyna deıin olardyń sanyn 30-dan asyrý josparlanǵan.

– Osyndaı jabdyqtar Jańaarqa, Osakarov jáne Qarqaraly aýdandaryndaǵy ortalyq aýrýhanalarǵa da qoıylady. Aýyl turǵyndary úshin bul jaǵymdy jańalyq. Biz olarǵa joǵary mamandandyrylǵan medısınalyq kómekti qoljetimdirek etýge tyrysamyz, – dep atap ótti ol.

Apta boıy demalyssyz, kúni-túni jumys isteıtin ortalyqta táýligine 50 naýqasty qabyldaýǵa múm­kin­dik bar. Terapevtik beıindegi 300 tósektik orny bar klı­nıkada oblystyń barlyq jerinen, ásirese aýyldyq jerlerden pasıentter jatyp, em ala alady. Aıta ketetin bir jaıt, jergilikti turǵyndardyń basym bóliginiń MÁMS aıasynda tegin medısınalyq qyzmet alýǵa múmkindigi bar.

Qaraǵandy oblysy