Chempıonat jeńimpazdaryn quttyqtaǵan partııanyń atqarýshy hatshysy Ashat Oralov bul týrnırdiń Balalar jylyna oraı jáne elimizde shahmatty keńinen nasıhattaýǵa baǵyttalǵanyn atap ótti.
«Búginde Qazaqstan álemdik shahmat reıtınginde 37-orynda tur. Otandyq shahmatshylar álemdik deńgeıde top jaryp, elimizdiń dańqyn asqaqtatyp júr. Partııa dástúrli túrde ashyq respýblıkalyq týrnır ótkizýdi qolǵa alyp otyr. Kelesi jyldan bastap bul bastama elimizdiń barlyq óńirinde jalǵasyn tabady. Memleket basshysy Qasym-Jomart Toqaev shahmat sportyn damytý men ony qoldaýǵa erekshe kóńil bólip keledi. Biz jastardyń, balalardyń qabilet-qarymyn baıqap otyrmyz jáne elimizdegi shahmat sportynyń damýyna óz úlesimizdi qosqymyz keledi», dedi Ashat Oralov.
О́z kezeginde halyqaralyq grossmeıster Jansaıa Ábdimálik mundaı chempıonattardyń jas shahmatshylar úshin mańyzy zor ekenin atap ótti.
«Birinshiden, bul shahmat sportyn dáripteý bolsa, ekinshiden, balalar úshin úlken tájirıbe. Olar elden shyqpaı-aq túrli deńgeıdegi qarsylastarmen básekege túsýge múmkindik alady. Munda qatysýshylar kóp, demek básekelestik bar. Týrnırdi joǵary deńgeıde uıymdastyrǵany úshin Amanat partııasyna alǵysymdy bildiremin», dedi Jansaıa Ábdimálik.
Týrnır jeńimpazdarynyń biri Konstantın Kazakovtyń aıtýynsha, búginde elimizde shahmatqa degen qyzyǵýshylyq artqan.
«Osyndaı týrnırlerdiń ótkizile bastaǵany qýantady. О́ıtkeni jas kezimde mundaı is-sharalar sırek ótetin edi. Qazir bul sport túrin damytýǵa memleket tarapynan qoldaý kórsetilýde, partııa da óz úlesin qosyp otyr. Aldaǵy ýaqytta báseke deńgeıi arta túsedi degen oıdamyn», dedi Konstantın Kazakov.
Týrnır qorytyndysyna sáıkes «Jastar» kategorııasy boıynsha birinshi oryndy Konstantın Kazakov, ekinshi oryndy Baqtııar Nuǵymanov jáne úshinshi oryndy Talǵat Ǵubaıdýllın ıelendi. Al «Balalar» kategorııasynda Aldııar Ańsat úzdik dep tanylsa, ekinshi oryndy Madııar Altynbekuly jáne úshinshi oryndy Ábýáli Sqaq qanjyǵasyna baılady.
Saıystyń jalpy júlde qory 5 mln teńgeden asty. Jeńimpazdar men júldegerlerdi belgili qazaqstandyq shahmatshylar Jansaıa Ábdimálik, Bıbisara Asaýbaeva, Dármen Sádýaqasov jáne Merýert Kamalıdenova marapattady.
Aıta ketsek, týrnır FIDE reıtıngtik esebimen shveısarııalyq júıe boıynsha ótti. Qatysýshylardyń jerebesi Swiss Manager baǵdarlamasyn qoldaný arqyly ótkizildi. Amanat CUP týrnıri aldaǵy ýaqytta jyl saıyn ótkizilmek.
