Maqsat – memleketaralyq baılanysty nyǵaıtý

Eki memleket arasynda parlamentaralyq, iskerlik, ǵylymı jáne gýmanıtarlyq baılanystardy nyǵaıtý maqsatynda taıaýda Májilis depýtattary Koreıa Respýblıkasyna saparmen baryp keldi. Atalǵan palatanyń Agrarlyq máseleler komıtetiniń tóraǵasy Romın Mádınov bastaǵan delegasııa quramynda depýtattar Álıhan Toıbaev, Svetlana Qadyrálıeva, Roman Kım jáne ǵylym, bılik, kásipkerlik salasynyń ókilderi boldy. Qazaqstan delegasııasy mı­n­ıstrlik ókilderimen, kásip­kerlermen jáne tanymal jýrnalıstermen kezdesti. Aıta ketý kerek, osy sapar barysynda bıyl jazda О́skemen qalasynda ótkeli turǵan forým máselesi sóz boldy. Shyǵys Qazaqstan oblysynyń ákimi Berdibek Saparbaevtyń bastamasymen úlken bıznes-forým ótetini josparlanýda. Oǵan Koreıadan arnaıy meımandar shaqyrylyp otyr. Shyǵys Qazaqstan óńiriniń tabıǵaty men ekonomıkalyq áleýeti jáne keleshegi jańa jobalardyń iske asyrylýyna jol ashatyny sózsiz. Qazirdiń ózinde oblysta qazaqstandyq-koreıalyq birlesken jobalar iske asyrylyp jatyr. Sonymen qatar, 1991 jyly Qazaqstan Prezıdenti Nursultan Nazarbaevtyń Jarlyǵymen Semeı synaq aımaǵynyń ja­byl­ǵandyǵy, Qazaqstannyń ıadrolyq qarýdan bas tartqany, Elbasynyń ıadrolyq qarýǵa qarsy bastamalary álemge áıgili. Sapar barysynda Koreıa Res­pýblıkasy Ulttyq As­sam­bleıasynda eki eldiń par­lament­shileri júzdesip, pikir almas­ty. Taqyryptyń arqaýy aýyl sha­rýa­shylyǵyn damytý máseleleri tóńireginde boldy. R.Mádınov óz sózinde Qazaqstannyń agrarlyq salasy, qolǵa alynyp jatqan ister jaıly aıtyp ótti. Qazaq eliniń agroónerkásip salasynyń ınvestısııalyq múmkindikteri týraly baıandap berdi. Zańnamalyq turǵyda aýyl sharýashylyǵy taýaryn óndirýshilerge qandaı jeńildikter jasalatynyna toqtaldy. Búgingi tańda Qazaqstanǵa qomaqty ınvestısııa salyp otyr­ǵan eldiń biri – Koreıa Res­pýblıkasy. Eki el­diń ynty­maq­tastyǵy jańa múm­kindikterge jol ashyp otyr. Qazaqstan delegasııasy ǵylymı-zertteý ınstıtýtynda, sharýa qoja­lyqtarynda boldy, sondaı-aq, jylyjaılardy aralap kórdi. Agrarlyq salaǵa engizilip jatqan jańa tehnologııalarmen tanysty. «Egemen-aqparat».