Mysaly, Almaty qalasy boıynsha áleýmettik medısınalyq saqtandyrý qorynyń dırektory Tileýhan Ábildaev bıylǵy tórt aıda bitken iske qatysty baspasóz jıynyn ótkizip, BAQ tarapynan qoıylǵan suraqtarǵa jaýap bere kele, joǵary tehnologııalyq operasııalardy qarjylandyrý 5,4 mlrd teńgege artyp, bıyl EKO prosedýralaryna 3,2 mlrd teńge bólingenin málimdedi.
MÁMS-tiń mańyzdylyǵy sonda, perzent súıýdi ańsaǵan myńdaǵan erli-zaıyptylardyń úmitin úkilep, EKU sııaqty qymbat rásimderdi qarjylandyrýdy kóbeıtti. Mysaly, osy jylǵa 3152 qyzmetke 3,2 mlrd teńgeden astam qarjy bólindi. Bıylǵy 4 aıda jalpy somasy 484 mln teńgege EKU-nyń 476 rásimi ótkizildi. Búginde medısınalyq saqtandyrý aıasynda qalanyń segiz medısınalyq uıymy ekstrakorporaldyq uryqtandyrýdy júzege asyrýda.
Qordyń tegin medısınalyq kómektiń kepildik berilgen kólemi sheńberinde jáne MÁMS paketi aıasynda medısınalyq qyzmetterdi qarjylandyrýdy jalǵastyryp jatqanyn atap ótken jón.
«MÁMS engizilgennen beri Almaty qalasynyń densaýlyq saqtaý bıýdjeti edáýir artty. 2022 jylǵa naqtylanǵan bıýdjet 242,1 mlrd teńgeni qurady, bul ótken jylmen salystyrǵanda 17,3%-ǵa artyq», deıdi T.Ábildaev.
Bıylǵy 4 aıda qor MÁMS paketinde Almaty qalasy boıynsha medısınalyq kómekke tóleýge shamamen 54,9 mlrd teńge baǵyttaǵan. Qańtar men sáýir aılary aralyǵyndaǵy shyǵyndardyń basym bóligi stasıonarlyq medısınalyq kómekti tóleýge tıesili, bul – 28,5 mlrd teńgeden astam. Konsýltasııalyq-dıagnostıkalyq kómek kórsetkeni úshin medısınalyq uıymdarǵa taǵy 11,4 mlrd teńge tólendi. Onyń ishinde eń kóp suranysqa ıe – KT jáne MRT qyzmetteri.
Sol sııaqty MÁMS júıesi aıasynda ońaltý kómegine 3,4 mlrd teńge baǵyttaldy. Spıker mindetti áleýmettik medısınalyq saqtandyrý júıesin engizý medısınalyq ońaltýdy qarjylandyrýdy ulǵaıtýǵa jáne onyń qoljetimdiligin edáýir arttyrýǵa múmkindik bergenin atap ótti.
Joǵaryda atap ótkendeı, Almatydaǵy MÁMS júıesine jyl basynan beri 398 mlrd teńgeden astam qarajat túsken.
Áleýmettik medısınalyq saqtandyrý qorynyń Almaty qalasy boıynsha dırektory qordyń 2017 jyldan beri mindetti medısınalyq saqtandyrýǵa qarajat jınaqtap kele jatqanyn, al 2018 jyldan bastap tegin medısınalyq kómektiń kepildik berilgen kólemi (TMKKK) sheńberinde, sondaı-aq 2020 jyldyń 1 qańtarynan bastap mindetti medısınalyq saqtandyrý júıesi aıasynda medısınalyq kómekti strategııalyq satyp alýshy ekenin eske saldy.
«2022 jyldyń 5 aıynda MÁMS júıesine túsimder 398,4 mlrd teńgeni qurady. Túsimderdiń negizgi úlesin 15 jeńildik sanaty úshin memlekettiń jarnalary quraıdy, bul – 42%-dan astam, jumys berýshilerdiń aýdarymdary – 34,7%-dan astam jáne ekonomıkalyq belsendi halyqtyń jarnalary – 22,6%», dedi T.Ábildaev.
О́ńirler boıynsha eń kóp kirister Almaty, Nur-Sultan qalalary men Qaraǵandy jáne Shyǵys Qazaqstan oblystaryna tıesili.
Spıker MÁMS-tiń engizilýiniń nátıjesinde, turǵyndar úshin konsýltasııalyq-dıagnostıkalyq kómektiń qoljetimdiligi artqanyna toqtaldy. Sondaı-aq qala turǵyndaryna medısınalyq uıymdar tarapynan quqyq buzylǵan jaǵdaıda kez kelgen qala turǵyny paıdalana alatyn keri baılanys arnalary bar ekenin jetkizdi. Atap aıtqanda, Qoldau24/7 mobıldi qosymshasy, 1406 biryńǵaı baılanys ortalyǵy jáne fms.kz. resmı saıtyna kelip túsken barlyq ótinish mindetti túrde qarastyrylady.
ALMATY
