Ekonomıka • 30 Maýsym, 2022

Tartymdy jobalarǵa ınvestor daıyn

41 ret kórsetildi

Qazaqstan ekonomıkasyn damytý jáne ártaraptandyrýǵa sheteldik ınvestorlar belsendilik tanytýda. Bul elordada «Astana Finance Days 2022: Turaqtylyq, áleýmettik jaýapkershilik, ósý» taqyrybynda ótken halyqaralyq konferensııada belgili boldy.

Táýelsizdik jyldary elimizge 390 mlrd dollar kóleminde tikeleı sheteldik ınvestısııa tartylǵan eken. Onyń basym bóligi sońǵy 10 jylda salynǵan. Máselen, byltyr ınvestısııalardyń jalpy aǵyny 24 mlrd dollardy quraǵan. Bul – aldyńǵy jylmen salystyrǵanda 38%-ǵa artyq kórsetkish. Sonyń ishinde munaı jáne gaz salasyna salynǵan salymdar 28%-dy ǵana qurasa, 2018-2019 jyldary olardyń úlesi 50%-ǵa teń bolǵan. Halyqaralyq jıynǵa qatysyp, sóz sóılegen Úkimet basshysy elimizdiń ár salasyna ınvestısııanyń kóbeıýi el ekonomıkasyn ártaraptan­dyrý belsendi júrip jatqanyn kórsetetinin, endi energetıka men aýyl sharýashylyǵy salasyndaǵy múmkindikterdi kóbirek zerdeleý qajettigin aıtty.

Konferensııa barysynda kóptegen sheteldik ınvestor óz jobalaryn tanystyrdy. Mysaly, «Shevron» kompanııasy Tikeleı ınvestısııalar qoryn qurǵanyn jetkiz­di. «Astana» halyqaralyq qarjy ortalyǵynda ashylǵan Chevron Direct Investment Fund kom­panııa­­sy Energetıka mınıstrligimen jasalǵan memorandým aıasynda qurylyp otyr. 2021 jylǵy 11 qazanda mınıstrlik pen kompanııa 248,5 mln dollar somasynda ınvestısııa quıý qoryn qurý týraly kelisimge kelgen.

Endi, mine, jańa ınves­tor-kompanııa Qazaqstannyń aqparattyq jáne sıfrly tehnologııalar, qorshaǵan ortany qorǵaý, munaı-gaz ben qyzmet kórsetý, taýar óndirý salalaryndaǵy kásiporyndar­ǵa ınvestısııa quıý arqyly el ekonomıkasyna qoldaý  kórset­pek. «Irikteý barysynda biz «Shevron» kompanııasynyń ekonomıkalyq jobalarǵa degen talaptary men krıterııleri tıimdi uıymdastyrylǵanyn kórdik. Sondyqtan olardyń mol tájirıbesi qazaqstandyq kásipkerlerdiń áleýetiniń   ósýine yqpal etip, ekonomıkany damytýǵa arnalǵan bıznes-jobalar da tartymdy bolady degen úmittemiz», deıdi Energetıka mınıstri Bolat Aqsholaqov.

Al «Shevron» kompanııasy Eýrazııa bólimshesiniń Qarjy jónindegi bas menedjeri Deımon Tornbergtiń aıtýynsha,  kompanııa Qazaqstannyń strategııalyq josparlaryna saı keletin, ekonomıkanyń kiristiligin arttyratyn joba­larǵa ınvestısııa quıýdy qaras­tyryp jatyr. Eger kásip­kerler tarapynan barlyq talapqa saı keletin tartymdy bıznes jobalary bolsa, qarjylandyrýǵa ótinish bere alady. Barlyq aqparatty www.cdif.kz saıtynan alyp, osynda ótinim qaldyrýǵa bolady.

Sońǵy jańalyqtar

Uqsas jańalyqtar