Oqý jylyn uzartýdy usynyp otyrǵan pedagogter qosymsha tórt apta bilim alýshylardyń kúndelikti oqý júktemesin azaıtýǵa kómektesetinin alǵa tartady. Sonymen qatar oqý jylyn uzartý «kúrdeli» taqyryptardy az ýaqytta ıgertý máselesin sheshedi. Sondaı-aq jazǵy demalystyń uzaqtyǵyn qysqartý bilim alýshylardyń alǵan bilimin joǵaltpaýyna septigin tıgizedi.
BINOM SCHOOL mektebiniń basqarýshy dırektory Araılym Maǵzumova: «Bizdiń el oqý jylyndaǵy apta sany (34 oqý aptasy) eń qysqa memleketterdiń biri. Respýblıkamyzdyń bilim alýshylary jylyna 130 kúnnen astam ýaqyt demalady bul álemdegi eń uzaq demalys desek bolady. Salystyratyn bolsaq: mysaly, Izraılde demalys uzaqtyǵy 84 kún, Ońtústik Koreıada – 90 kún, Japonııada – 102 kún. Zertteýler nátıjesi kórsetkendeı, balalar uzaq úzilisten keıin ıgergen materıaldyń 25%-yn umytatynyn kórsetip otyr. Sondyqtan biz qazaqstandyq mektepterdegi oqý jylyn 38 aptaǵa deıin, ıaǵnı oqý jylyn 15 tamyzda bastap, 5 maýsymda aıaqtaýdy usynamyz. Nemese qyrkúıek aıynda ádettegideı bastalsa, onda 20 maýsymǵa deıin uzartý kerek», dedi.
«Ádilet» respýblıkalyq orta jáne mektepke deıingi bilim berý qaýymdastyǵynyń tóraǵasy Dınara Qudaıqulova da óz sózinde oqý jylyn uzartý úshin ońtaıly dep sanaıtyn merzimderdi atap ótti: «20-25 tamyzdan bastap balalar shyǵýy kerek, shyn máninde eki apta boıy balalar oqý prosesine tolyǵymen kire almaıdy dep sanaımyz. 20-25 tamyzdan 5 maýsymǵa deıin kem degende uzartylýy kerek», dedi ol.
Sarapshylardyń aıtýynsha, oqý jylynyń uzaqtyǵyn arttyrý synyptardaǵy júktemeni 1-2 saǵatqa qysqartýǵa, kabınet tapshylyǵyn ońtaılandyrýǵa, bilim alýshylardyń qosymsha bilim alýyna jáne pedagogterdiń ózderin kásibı damytýyna kóbirek ýaqyt bólýge múmkindik beredi.
