Baldyrǵandardy mektepke qabyldaý 1 sáýirde bastalǵan bolatyn. Al qujat qabyldaý merzimi 2022 jylǵy 1 tamyzda aıaqtalady. Biraq jaýapty vedomstvo ata-analarǵa qujatty tezdetip tapsyrýǵa keńes beredi.
Mektepke deıingi jáne orta bilim komıtetiniń tóraǵasy Gúlmıra Kárimova: «Ata-analarǵa qujattardy tezirek tapsyrýǵa keńes beremiz, óıtkeni qabyldaý 1 tamyzda aıaqtalady. Al 1 tamyzdan bastap mektepterde oqý-tárbıe úrdisin sapaly josparlaý men uıymdastyrý, oqýlyqtardy taratý, synyptardy qalyptastyrý jáne basqa da uıymdastyrý jumystary bastalady. Qujat qabyldaý bastalǵanyna úsh aı ótti jáne osy ýaqyt ishinde 320 myńǵa jýyq ótinish tústi. Onyń 82%-y elektrondy formatta qabyldandy. Sonymen qatar memlekettik tilde bilim alǵysy keletinderdiń úlesi búginde 70%-ǵa jýyqtady. Qazaq tilinde oqytatyn synyptarǵa qabyldaý boıynsha eń joǵary kórsetkishter Qyzylorda (92,4%), Túrkistan (89%) jáne Mańǵystaý (87,1%) oblystarynda tirkeldi», dedi.
Oqý-aǵartý mınıstrligi azamattarǵa yńǵaıly bolý úshin qyzmetti avtomattandyrǵan edi, osyǵan oraı ata-analar qujatty egov.kz veb-portaly arqyly tapsyra alady. Sondaı-aq olar qujatty dástúrli qaǵaz formatynda da ótkizýge quqyly. Jańa oqý jylynda 400 myńnan asa bala 1-synypqa barady dep kútilip otyr.
