Jańa zańnamalyq túzetýler kolledj stýdentterine oqý-óndiristik sehtar men oqý sharýashylyqtarynda ózderi óndirgen ónimderdi satýǵa jaǵdaı jasaıdy. О́zgeristerdi ázirleýshiler mundaı shara stýdentterdiń oqýǵa degen qyzyǵýshylyǵyn arttyryp, yntalandyratynyn atap ótti.
Jaýapty vedomstvo janyndaǵy Tehnıkalyq jáne kásiptik bilim departamentiniń dırektory Nasymjan Ospanova stýdentterdiń kóbine nan jáne kondıterlik ónimderi satylatynyn jetkizdi.
«Qazirgi tańda 444 memlekettik kolledjdiń 97-inde stýdentter óz ónimderi men qyzmetterin satyp jatyr. Mysaly, olar kolledj qabyrǵasynda daıyndalǵan táttilerdi, nan-toqash jáne kondıterlik ónimderdi satady. Sondaı-aq «Dánekerleý isi» mamandyǵy boıynsha oqıtyn stýdentter óndiristik tájirıbe kezinde temirden konstrýksııalar jasap, eńbek naryǵyna shyǵarady. Biz bul jerde tolyq kásipkerlik qyzmet týraly emes, tek óndiristik oqý men tájirıbe kezinde óndirilgen ónimderdiń satylyp, kolledj bıýdjetin tolyqtyrýǵa bolatynyn ǵana aıtyp otyrmyz. Bul qarajatty óndiristik oqytýǵa arnalǵan elektrodtardy nemese metaldy satyp alýǵa paıdalanýǵa bolady. Mundaı jumystar elimizdiń basqa kolledjderinde de jalǵasyn tabady», deıdi N.Ospanova.
