Máselen, Reseı shekarasyna deıin qatynaıtyn tas jol janyndaǵy bazarda eń ótimdisi – qoı. Bazar aýlasyna syımaǵan satýshylar malyn dalada saýdalap tur. Bul bazarda satylymǵa shyǵarylǵan qoı Batys Qazaqstan oblysynan, Atyraýdyń Qyzylqoǵa, Qurmanǵazy, Inder, Jylyoı aýdandarynan ákelingen. Bazarda tusaq úshin 60-65 myń teńge suraıdy. Erte týǵan qozynyń eń tómengi baǵasy – 35 myń teńge. Qasapshylar bir qoıdy úsh myń teńgege soıyp beredi.
Iri qaranyń baǵasy 370 myń teńgeden bastalady. Bul – úsh jasar ógizdiń baǵasy. Al urǵashy sıyrdyń eń arzany 400 myń teńge turady. «О́zim baqqan ógizdi satýǵa ákeldim. Shamamen 350 keli tartatynyna senimdimin. Salmaǵyna, qońyna baılanysty 700 myń teńgege satamyn. Budan tómen baǵaǵa bere almaımyn», deıdi Inder aýdanynan kelgen er adam.
Munaıly shahardyń ortalyq bóligine taıaý ornalasqan «Týma» bazaryndaǵy baǵa ózgelerinen qymbattaý kórindi. Munda qozyny 40 myń teńgege satyp alýǵa bolady. Iri qoı 100 myń teńgege baǵalanyp tur. Al semiz isek úshin 120 myń teńge suraıtyndar bar. Bul bazarda ár qoıdy soıý baǵasy – tórt myń teńge.
– Jyl saıyn Qurban aıt kúnderi mal baǵasy nege kúrt qymbattaıtynyn túsinbeımin. Saýap jınaıtyn kúnderi muny retteıtin tetik joq pa? Bir isekti 120 myń teńgege satyp alý múmkin emes, – deıdi qala turǵyny Nurhan Tájiǵalıuly.
Atyraý oblysy
