Koronavırýs ınfeksııasynyń taralýy boıynsha Almaty – «sary aımaqta». Kóktemniń basy men ortasynda aýrý kórsetkishteri tómendegen bolatyn, endi qaıta ósip jatyr. Osylaısha, juqtyrý jaǵdaılarynyń ósýi 0,2% boldy, taralý koeffısıenti – 1-den joǵary. Juqtyrý oshaqtarynyń eń kóp sany Bostandyq, Almaly, Alataý, Bostandyq jáne Medeý aýdandarynyń aýmaǵynda ornalasqan. Infeksııanyń taralýyna qoǵamdyq oryndarǵa barý, úıdegi, qalalyq kóliktegi, jumys ornyndaǵy qarym-qatynastar, sondaı-aq vaksınalaý men revaksınalaý qarqynynyń tómendeýi sebep bolyp otyr.
Turǵyndar arasynda indetke shaldyǵý derekterin azaıtý maqsatynda qala ákimshiligi vaksınalaý men revaksınalaý jasatyp, naýqastardy oqshaýlaý barysyn baqylaý, aldyn alýdyń negizgi erejelerin saqtaý qajet ekeni týraly túsindirý jumystaryn kúsheıtý boıynsha birqatar shara qabyldady. Sonymen qatar pandemııanyń jańa tolqynyna Almatyda 23 kovıd klınıkasy daıyndaldy. Onda barlyǵy 7 myń tósektik oryn bar, olardyń 250-i jansaqtaý bólimine tıesili.
Medısınalyq qoǵamdastyq ókilderimen keńes barysynda KVI-diń aldyn alý máseleleri qaraldy.
Premer-Mınıstrdiń orynbasary E.Toǵjanov qalada juqtyrý jaǵdaılarynyń ósýine, sondaı-aq MSAK jumysyn úılestirýdiń, vaksınalaý men revaksınalaýdy uıymdastyrýdyń mańyzdylyǵyna, Almaty qalasynyń densaýlyq saqtaý júıesiniń koronavırýs boıynsha ahýaldyń órshýine daıyndyǵyna nazar aýdardy.
«Búgin qoıylǵan mindetterdi qalanyń Bas memlekettik sanıtarlyq dárigerimen birge taldap, koronavırýs ınfeksııasynyń aldyn alý jáne taralýyna jol bermeý boıynsha qajetti sharalar qabyldaýdy suraımyn», dep atap ótti E.Toǵjanov.
Keńes sońynda vıse-premer qala basshylyǵyna COVID-19-ǵa qarsy ımmýndaý naýqanyn kúsheıtýdi tapsyrdy. Sondaı-aq halyq arasynda sapaly túsindirý jumystaryn júrgizýdi kúsheıtý qajettiligin atap ótti.
Sonymen qatar Premer-Mınıstrdiń orynbasary Almaty qalasyndaǵy Áleýmettik qyzmetter úıinde boldy. Onda 11 uıym ornalasqan. Ishinde Turǵyn úı saıasaty basqarmasy, Halyqty jumyspen qamtý ortalyǵy, HQO, «Atameken» jáne t.b. bar. Bul jerde qala turǵyndaryna «bir tereze» qaǵıdaty boıynsha bir orynda 700-den asa qyzmet kórsetiledi. Ortalyqta tegin zańgerlik keńes pen psıhologtiń kómegin alýǵa bolady.
E.Toǵjanov áleýmettik qoldaý jáne halyqtyń ómir súrý sapasyn arttyrý memlekettik saıasattyń basty baǵyttarynyń biri jáne Úkimettiń birinshi kezektegi mindeti ekenin atap ótti.
