Áńgime erkin formatta ótti. Jastar qyzyqty jobalary týraly aıtyp, ıdeıalarymen bólisýge, sondaı-aq mańyzdy suraqtardy kóterip, olarǵa jaýap alýǵa múmkindik aldy.
Vıse-premer óz sózinde el halqynyń 20%-yn 14 pen 29 jas aralyǵyndaǵy jastar quraıtynyn atap ótti. Jas qazaqstandyqtardyń jan-jaqty damýy – Úkimet úshin basym mindet. Memleket basshysynyń qoldaýynyń arqasynda elimizde jastardy qoldaýǵa arnalǵan birqatar joba júzege asyrylýda.
«Prezıdent Qasym-Jomart Toqaev jastardyń qozǵaýshy kúsh ekenin aıtyp, onyń zor áleýetin atap ótti. Biz bul deńgeıdi joǵarylatýymyz kerek. Men sizderdi óz ýaqyttaryńyz ben áleýetterińizdi ádiletti jańa Qazaqstandy qurý jolyna paıdalanýǵa shaqyramyn. Týǵan eldiń ıgiligi úshin qyzmet etýge, adal eńbekke, progressıvti bilimge jáne ozyq tájirıbege súıenýge úndeımin. Biz birge jańa Qazaqstan quramyz!», dedi E.Toǵjanov.
Jastar kóshbasshylary óz jobalarymen, ıdeıalarymen Prezıdenttiń bastamasyn qoldap, jańa Qazaqstandy qurýǵa degen nıetterin jetkizdi.
Kezdesýde esirtkige táýeldiliktiń aldyn alýǵa jáne esirtkiniń taralýyna qarsy kúreske baǵyttalǵan «NarkoSTOP», qazaq tildi halyq úshin shet tilderin damytýǵa baǵyttalǵan «Tilder saıabaǵy» jobalary tyńdaldy. Vıse-premer kezdesý barysynda aǵylshyn tilin oqytýǵa arnalǵan arnaıy oryndar usynýdy tapsyrdy. Sondaı-aq ınklıýzıvti qoǵamǵa da kóńil bólindi.
E.Toǵjanov ınklıýzıvti qoǵam erekshe qajettilikteri bar jáne múmkindikteri shekteýli adamdar úshin táýelsiz ómir saltyn júrgizýge jáne áleýmettik kásipkerlikti damytý esebinen ómirdiń barlyq salasyna, ekonomıkalyq táýelsizdikke belsendi qatysýǵa jaǵdaı jasalatyn qoǵam retinde qarastyrylýǵa tıis ekenin atap ótti.
«Inklıýzıvti qoǵamdy qalyptastyrý, ásirese jastar arasynda jappaı ınklıýzıvti sanany qalyptastyrýǵa baılanysty kóptegen máseleni sheshýdiń irgetasy bolyp tabylady. Bul úshin jurtshylyqty jáne jastardy oryn alǵan problemalardy sheshýge emes, alǵysharttar men sebepter jasaýǵa belsendirek tartý qajet. Salamatty ómir salty, bilim alý, kásip pen daǵdylardy ıgerýden bastap», dedi E.Toǵjanov.
Jas belsendilerdiń usynystaryn tyńdaǵan Eraly Toǵjanov qala jastarynyń áleýeti týraly jyly lebizin bildirip, qazirgi ýaqytta memlekettik jastar saıasatynda jańa tásilderdi qalyptastyrý mańyzdy ekenin jáne Almaty osy úderiste trend-meıker bolýǵa tıis ekenin atap ótti.
Kezdesý sońynda Premer-Mınıstrdiń orynbasary NARXOZ ýnıversıtetiniń úzdik magıstranttaryna dıplomdaryn saltanatty túrde tapsyrdy.
Sonymen qatar E.Toǵjanov Almaty qalasyna jasaǵan jumys sapary aıasynda «Shyńǵa О́rleý» áleýmettik klýbynyń ınfraqurylymymen tanysty.
«Shyńǵa órleý» – elimizdegi mańyzdy áleýmettik joba. Munda kóp balaly, az qamtylǵan otbasylardan shyqqan mektep jasyndaǵy balalar qosymsha tegin bilim alady, sporttyq jáne shyǵarmashylyq úıirmelerge qatysady. Mundaǵy tálimgerler – zeınetkerler men múmkindigi shekteýli jandar. Búgingi tańda Almaty qalasynda osyndaı 10 klýb jumys isteıdi, onda 180 adam eńbek etedi.
E.Toǵjanov Úkimetpen balalar men jastardyń bos ýaqytyn tıimdi paıdalanýdy uıymdastyrý boıynsha belsendi jumys júrgizilip, júıeli sharalar kesheniniń iske asyrylǵanyn atap ótti.
«Úkimet jyl sońyna deıin balalardyń 80%-yna jýyǵyn qosymsha sport seksııalarymen jáne úıirmelermen qamtýdy josparlap otyr. Jalpy bilim beretin mektepterdiń, balabaqshalar men kolledjderdiń 28 myńnan asa dene shynyqtyrý muǵalimi aptasyna keminde 3 qosymsha sport úıirmesin ótkizedi. Bul sharalar buqaralyq sportty damytýǵa baǵyttalǵan. Sporttyq ınfraqurylym aıasy keńeıýde, 2021 jyly 41 DSK iske qosyldy, onyń ishinde 32-si aýdan ortalyqtary men aýyldarda. 2025 jyldyń sońyna deıin 131 sport nysanyn salý jáne qaıta jańartý josparlanyp otyr», dedi vıse-premer.
Balalardyń klýbta bolý ýaqytynda barlyq negizgi mektep pánderi (matematıka, qazaq, orys, aǵylshyn tilderi, IT-tehnologııa) boıynsha úı tapsyrmasyn daıyndaýda kásibı kómek kórsetý ǵana emes, sonymen qatar sporttyq seksııalar jáne shyǵarmashylyq úıirmeler – saýyqtyrý-dene shynyqtyrý, sándik-qoldanbaly óner, shahmat, horeografııa, dene shynyqtyrý, mýzyka, dombyra, sahnalyq sheberlik jáne t.b. sabaqtar qarastyrylǵan.
Kezdesý qorytyndysy boıynsha E.Toǵjanov Almaty qalasynyń ákimdigine balalardy odan ári súıemeldeý boıynsha sharalar qabyldaýdy, túrli shyǵarmashylyq jobalar men sporttyq konkýrstarǵa, onyń ishinde jumys istep turǵan memlekettik bilim berý, mádenıet jáne sport uıymdarynyń bazasynda qatysýyna múmkindikter jasaýdy tapsyrdy.
ALMATY
