Reıtıngtik upaıler beriletin bási bólek jáne mártebesi joǵary jarysta jerlesterimizdiń arasynan eń táýir nátıjege Baýyrjan Narbaev qol jetkizdi. 60 kılo salmaqta kúsh synasqan ol alǵashqy aınalymdarda qytaılyq Lıý Venjı men fransııalyq Rebol Shedrıshti utyp, shırek fınalda jastar arasyndaǵy (U-23) Eýropa birinshiliginiń kúmis jáne qola júldegeri, grýzııalyq Temýr Nosadzeni jeńdi. Jartylaı fınalda onyń joly Grýzııanyń taǵy bir beldi balýany Lýhýmı Chhvımıanımen qıysty. Álem chempıony, Eýropa oıyndarynyń jeńimpazy degen ataǵy bar saqa sportshyǵa Narbaevtyń áli jetpedi. Al qola medal úshin tartysta qandasymyz Fransııanyń 19 jasar jas óreni Roman Valade Pıkardqa ese jiberip, besinshi orynda qalyp qoıdy.
Býdapeshtte tájirıbeli Ǵusman Qyrǵyzbaevqa aıryqsha senim artqan edik. Byltyr ol dál osy qalada nebir myqtylardy jolynan yǵystyryp, álem chempıonatynyń kúmis júldegeri atanǵan edi. Alaıda 66 kılo salmaq dárejesine aýysqannan keıin bul jigittiń baǵy bir janbady. Osy týrnırdiń tusaýkeser kezdesýinde Qyrǵyzbaev komandalyq saıystaǵy Tokıo Olımpıadasynyń qola júldegeri, ızraıldik Barýh Shmaılovtyń aıaǵyn kókten keltirgende qatty qýandyq. Biraq qýanyshymyz uzaqqa sozylmady. Kelesi kezeńde súringen Ǵusman qalyń toptyń arasynda qalyp qoıdy. О́kinishke qaraı, Maǵjan Shamshadın (60 kılo), Dastan Shaıahmetov (66 kılo), Danııar Shamshaev, Asqar Narqulov (73 kılo), Baraq Arqabaı, Aıbol Nysanáli (81 kılo), Ádilet Mıssın, Erasyl Jantaev (90 kılo), Aıbek Serikbaev jáne Serik Sálmenov (100 kılo) alǵashqy aınalymdardan asa almady.
Erler saıysynda úsh salmaqta Japonııa qurama komandasynyń músheleri bas júldeni oljalady. Olar – Hıfýmı Abe (66 kılo), Sanshıro Mýrao (90 kılo) jáne Kentaro Iıda (100 kılo). Asa jeńil salmaqta Belgııanyń betkeustary Iorre Ferstretenge teń keler eshkim tabylmady. 73 salmaq dárejesinde dara shyqqan Hıdaıat Geıdarovtyń tabysyna qazaq jankúıerleri de shattana qýandy. О́ıtkeni, Ázerbaıjannyń namysyn qorǵap júrgen bul balýan Qazaqstanda dúnıege kelgen. Balaýsa shaǵynda tarıhı Otanyna qonys aýdaryp, dzıýdo kúresine den qoıdy. Hıdaıat – álem chempıonatynyń eki dúrkin jáne Eýropa oıyndarynyń qola júldegeri, qurlyqtyń eki dúrkin chempıony. Sondaı-aq ol Islam yntymaqtastyǵy oıyndarynda altyn alyp, Dúnıejúzilik Ýnıversıadada ekinshi jáne úshinshi oryndardy ıelendi. 81 kılo salmaqta brazılııalyq Glerme Shmıd top jarsa, alyptardyń aıqasy Fransııanyń dańqy jer jarǵan dzıýdoshysy Teddı Rınnerdiń aıqyn jeńisimen aıaqtaldy.
Áıelder saıysynda bizdi eń jeńil salmaqtaǵy Ábıba Ábýjarqynova men asa aýyr salmaqtaǵy Kámıla Berliqash qýantady dep dámelendik. О́ıtkeni ótken aıdyń aıaǵynda olar Ulanbatyrda uıymdastyrylǵan Grand Slam dodasynda qola medaldy ıelenip, ózderiniń babynda ekenderin baıqatqan-tyn. Biraq bul joly ekeýiniń de joly bolmady. Ásirese, biz Ábýjarqynovanyń jeńilisine kúıindik. Ekinshi aınalymda ol ızraıldik Shıra Rıshonıden utyldy. Qazaq qyzy dál osy balýandy Mońǵolııanyń astanasynda jeńgen edi. Burymdylardyń tartysynda da Japonııa quramasy ozdy. Olar jeti salmaqtyń beseýinde bas júldeni oljalady. Qalǵan eki altyn Majarstan men Italııanyń balýandaryna buıyrdy.
