Aıta ketý kerek, partııalyq komıssııanyń kómegimen Býtakovka aýdanyndaǵy 5 gektar jer ýchaskesi memleket menshigine qaıtaryldy. Onda joıylýǵa shaq qalǵan alma baǵy bar. Alaıda amanattyqtar bıyl kúzde jergilikti turǵyndarmen birge senbilik ótkizip, alma aǵashynyń jańa kóshetterin otyrǵyzýǵa daıyn ekenin jetkizdi.
«Kóptegen qalada, sonyń ishinde Almatyda, ásirese taýly shaǵyn aýdandarda retsiz, júıesiz qurylystarǵa qatysty túıtkildi máseleler bar. Býtakovkadaǵy másele oń sheshimin taýyp keledi. Partııanyń kómegimen biz týyp-ósken jeriniń taǵdyryna beıjaı qaramaıtyn qarapaıym turǵyndardyń máselelerin sheshemiz. Bul – atqaryp jatqan jumysymyzdyń asa mańyzdy aspektisi», dedi Aýyl sharýashylyǵy mınıstrliginiń Jer resýrstaryn basqarý komıtetiniń tóraǵasy Murat Temirjanov.
«Gornyı gıgant» shaǵyn aýdanynyń turǵyndary da osyndaı máselelerge tap bolǵan. Kottedj qalashyǵyn turǵyzý úshin jańa qojaıyndary 9 gektar jerdegi aǵashtardy otap tastaǵylary keledi. Qazir munda alma baǵy ornalasqan.
«1989 jyly ákem kelisimshartta kórsetilgendeı, bul jerdi keıin muraǵa qaldyrý quqyǵymen 49 jylǵa jalǵa aldy. Munda búkil otbasymyzben birge alma ósirýmen aınalysamyz. 1998 jyly Talǵar aýdanyna tıesili jerlerdi Almaty oblysynan Almaty qalasyna berý týraly sheshim shyqty. Osylaısha, bizdiń baqshamyz qala aýmaǵynda qalyp qoıdy. Belgisiz sebeptermen jer ýchaskesiniń ıesi ózgerdi. Iаǵnı bizdi baqshamyzben, qurylys nysandarymyzben birge satyp jiberdi. Sol ýaqyttan beri ádildikke qol jetkizýge tyrysyp kelemiz», dedi jergilikti turǵyn Shaıahmet Hamraev.
Osy ýchaskeni berýdiń barlyq mán-jaıyn anyqtaý jumysy «Jer amanaty» komıssııasynyń sheshimimen qalalyq jer resýrstaryn basqarý departamentine júkteledi.
«Bir aı buryn Shaıahmet maǵan keńes alýǵa keldi. Onyń materıaldaryn zerttedim. Bul sırek alma aǵashtary saqtalǵan jalǵyz baq dep aıta alamyn. Qazir munda Hamraevtar otbasy men «Ermesaı» JShS-nyń ýchaskesi bar. Hamraevtar bul ýchaskeni Talǵar aýdany tusynda aldy. Ákimniń qaýlysy da, kýáligi de bar», dep atap ótti komıssııa múshesi, zańger Baqytjan Bazarbek.
Osy kúni partııalyqtar buryn Kamenskoe plato aýyly ornalasqan Medeý aýdany turǵyndarynyń shaǵymdaryn tyńdady. 2014 jyly bul jer qala aýmaǵyna qosyldy. Jergilikti turǵyndardyń aıtýynsha, qalaǵa qosylǵannan beri problemalar bastalǵan.
«Aq qaıyń» shıpajaıynan joǵary barlyq betkeı usaq ýchaskege bólingen. Bir kezderi munyń bári sharýa qojalyǵynyń aýmaǵy bolǵan edi. Sosyn qandaı da bir «ǵajaıyp» jaǵdaımen bul jerdiń barlyǵy jekemenshikke ótti. Eń qorqynyshtysy – qazir salynyp jatqan qurylys nysandary kez kelgen ýaqytta qulap ketýi múmkin. Betkeılerdi nyǵaıtý úshin arnaıy baqtar otyrǵyzyldy. Osylaısha, aýyl sharýashylyǵyn jolǵa qoıyp, qalanyń sımvoly – aport ósirdik. Kez kelgen ýaqytta osy kottedjderdiń úıindileri astynda qalamyz ba degen qorqynyshta ómir súrip jatyrmyz», deıdi jergilikti turǵyn Vasılısa Qýanysheva.
Komıssııa músheleri turǵyndardy jaǵdaıdy jónge keltirý úshin barlyq shara qabyldanatynyna sendirdi.
«Osy jer ýchaskeleriniń qalaısha jekemenshikke ótip ketkenin anyqtaý qajet. Onyń ústine bul ýchaskeler Ile-Alataý ulttyq parkimen shektesedi. Alaıda park aýmaǵyna 2 shaqyrym qashyqtyqta qandaı da bir qurylys nysandaryn turǵyzýǵa tyıym salynǵany belgili. Naqty shara qabyldanady. Jergilikti turǵyndardyń ómirine qaýip tóndiretin zańsyz, retsiz qurylys jumystary toqtatylýǵa tıis», dedi komıssııa tóraǵasy, partııa hatshysy Dáýlet Káribek.
Sonymen qatar amanattyqtar Ál-Farabı atyndaǵy Qazaq ulttyq ýnıversıteti aýmaǵynda belsendilermen jáne qoǵam qaıratkerlerimen kezdesti. Zańsyz berilgen 1,09 gektar jer sot sheshimimen ýnıversıtet menshigine qaıtarylady. Buǵan qosa osy másele «Jer amanaty» komıssııasynyń baqylaýyna alynady.
«2017 jyly Esep komıteti Ál-Farabı atyndaǵy QazUÝ ıeligindegi 1 gektar jer ýchaskesi jetispeýshiligin anyqtady. Bul jer 2017 jyly ákimdiktiń qaýlysymen ıelikten shyǵarylǵan. Osy zańsyzdyq anyqtaldy. Uıǵarym bar, merzimi aıaqtaldy, sondyqtan qaıtadan sotqa beremiz», dedi Baqytjan Bazarbek.
Jer máselesin jedel sheshý úshin qazaqstandyqtar búginnen bastap barlyq zań buzý faktileri týraly Amanat partııasynyń «Jedel jeli» 8 800 080 44 41 telefony arqyly habarlaı alady.
О́tinimder WhatsApp arqyly da +77008004441 nómiri boıynsha qabyldanady.
