Zaýyttyń aqparatyna qaraǵanda, absorberdiń monogıdratty sorǵysy isten shyqqan. Nátıjesinde gaz (kúkirt trıoksıdi) taraǵan.
«Bolǵan apat týraly jedel aqparat alǵan Jambyl oblysy boıynsha ekologııa departamentiniń basshylyǵy men zerthanalyq taldaý bóliminiń basshysy Taraz qalasynyń prokýratýrasymen birlesip, saǵat 21.20-da Súleımanov kóshesindegi zaýyttyń sanıtarlyq-qorǵaý aımaǵyn ólshedi. Nátıjesinde ftorly sýteginiń edáýir artqany anyqtaldy. Ammıak, kúkirtsýtek jáne kómirtegi oksıdi boıynsha asyp ketý anyqtalǵan joq.
Sondaı-aq saǵat 22.05-te Shaıqoryq kentiniń mańyndaǵy zaýyttyń SQA-da uqsas lastaýshy zattarǵa ólsheý júrgizildi, lastaýshy zattardyń artýy anyqtalǵan joq», dep jazdy kásiporynnan.
«Qazgıdromet» RMK Jambyl fılıalynyń málimetinshe, qalada aýanyń lastanýy qalqyma bólshekter boıynsha 1 ShJK aspaıtyn deńgeıde baıqalady.
Zerthanalyq quraldarmen qaıta jaraqtanyp, Polar gaz analızatoryn alǵan departament qyzmetkerleri, sońynan prokýratýra mamandary kúkirt qyshqyly sehynyń lastaýshy zattar shyǵaryndylarynyń kózinde ólsheýler júrgizý úshin, Kásipkerlik kodeksiniń negizinde «Qazfosfat» mıneraldy tyńaıtqyshtar JShS-na jospardan tys tekserýge bardy. О́lsheý kezinde seh jumysyn toqtatyp úrleý boıynsha jumystar júrgizildi, alaıda munda da lastaýshy zattardyń asyp ketýi anyqtalǵan joq.
«Qazirgi tańda, departament pen «Qazgıdromet» mamandary birlesip atmosferalyq aýanyń jaı-kúıimen sapasyna monıtorıng júrgizýde.
Osy oqıǵaǵa baılanysty oblys ákiminiń tapsyrmasy boıynsha ekologııa departamentiniń ókilderi quramyna kiretin jumys toby qurylǵanyn qosymsha habarlaımyz», delingen vedomstvonyń habarlamasynda.
