Qalalyq Tótenshe jaǵdaılar departamentiniń bastyǵy, polkovnık Rýslan Qasybaev mundaı sıfrly ınnovasııa órtti eki jaǵdaıda: tútin jáne joǵary temperatýra arqyly birden anyqtaıtynyn aıtady. Degenmen bul – sıfrlandyrýdyń álemdik tájirıbesine súıengen qanatqaqty joba.
«Tabıǵı park aýmaǵynda smart-kamera dep atalatyn optıkalyq sensorlyq jáne teplovızor qondyrǵylaryn engizý máselesin pysyqtap otyrmyz. Temperatýra kameralary arqyly beınebaqylaý jaıaý jáne áýe patrýlderine qaraǵanda tıimdi ári arzan», deıdi Rýslan Qasybaev.
Aıta keterligi, mundaı kameralar tutaný kózderin avtomatty túrde anyqtaýǵa, olardyń paıda bolý oryndaryn anyqtaýǵa, qajetti tehnıka men kúshti jetkizýde yńǵaıly marshrýttardy qurýǵa qabiletti. Osylaısha, Almaty qutqarýshylaryna «Qazavıaormanqorǵaý» órtti jedel sóndirý-
ge septesip otyr. Aptap ystyq kezde kún saıyn taýly-ormandy aımaqtyń ústinen ushyp otyrady. Patrýldeý kezinde daýysty sóıleıtin qurylǵysy men teplovızory bar dron qoldanylady.
«Dron órt shyqqan jerlerdi anyqtaýǵa jáne oǵan TJD mobıldi toptaryn jiberýge múmkindik beredi. Osyndaı syn-qaterlerdiń bári joǵary qaýiptilik dárejesine ıe», deıdi polkovnık.
Qazirgi tańda TJD-da órt sóndirý men apattyq-qutqarý jumystaryn júrgizýde jedel áreket etetin biriktirilgen otrıad qurylǵan, qutqarý qyzmetiniń avıabólimsheleri jaýyngerlik ázirlikte tur. Degenmen qorǵaýǵa alynǵan aımaqtarda tártip buzýshylarǵa 306 myń teńgeden astam aıyppul salynýy ábden múmkin.
«Erekshe qorǵalatyn tabıǵı aımaqtardyń aýmaqtary men belgilenbegen jerde ot jaqqany úshin Orman sharýashylyǵy mekemeleriniń qyzmetkerleri «Ákimshilik quqyq buzýshylyq týraly» kodekstiń 367-baby boıynsha ákimshilik aıyppul salýǵa haqyly. Jeke tulǵalarǵa salynatyn aıyppul somasy 10-nan 100 aılyq eseptik kórsetkishke deıin, al bul – 30 630 teńgeden bastap 306 300 teńgege deıingi soma», deıdi R.Qasymbaev.
Qazirgi ýaqytta TJD, IIB jáne Ile-Alataý MUTP qyzmetkerlerinen patrýl qyzmetkerlerimen 95-ten astam reıd júrgizilip, 45 órttiń aldyn alǵan. Osyǵan sáıkes ereje buzǵan 45 adam jaýapkershilikke tartyldy. Quzyrly mekeme birinshi kezekte órt shyǵýy múmkin qoqystardy shyǵarý qajettigin qaperge salady. Belgilengen jerden tys orynda sirińke, temeki qaldyǵyn laqtyrýǵa, qurǵaq shópterdi jaǵýǵa, ot jaǵýǵa jáne barbekıý quraldaryn paıdalanýǵa bolmaıdy.
Sondyqtan taýda demalatyndarǵa Ile-Alataý ulttyq saıabaǵynda ystyq tamaq pisirý úshin arnaıy jabdyqtalǵan 14 oryn (oryndyq, ústel, ot jaǵýǵa arnalǵan betondalǵan alań, barbekıý), Alma-Arasan shatqalynyń aýmaǵynda 12 oryn, Úlken Almaty, Kazachka ózenderi men Býtakovkada da oryndar bólingen.
О́rt qaýipsizdigine qatysty taǵy bir toqtala ketetin jaıt, taýly Almatyda órttiń aldyn alý maqsatynda qurǵaq shóp ósken 200 gektardaı aýmaq jyrtyldy. Bul jumysqa aýdan ákimdikteri tartylyp, osynyń arqasynda qurǵaq shóp 52 paıyzǵa azaıǵan.
«О́rt aýmaǵy 80 paıyzǵa azaıyp, bıyl 2,8 gektardy qurasa, ótken jyly órtke oranǵan aǵashtyń jalpy kólemi 13,5 gektarǵa jetti. О́rttiń shyǵýyna kóp jaǵdaıda otqa abaısyz bolý men shabylmaǵan qurǵaq ósimdikter sebep boldy», deıdi Almaty qalalyq TJD bastyǵy.
Almaty qalalyq TJD bastyǵy bıyl qurǵaq shóptiń órtenýi saldarynan jalynnyń turǵyn úılerge jaıylǵanyn da mysalǵa keltirdi.
ALMATY
