Qaraǵandy qalalyq Polısııa basqarmasyna qarasty Ortalyq polısııa bólimine 15 shilde kúni saǵat 21.00 shamasynda qaladaǵy aýrýhanalardyń birine jańa týǵan sábı jetkizilgeni týraly habarlama túsken. Sábı kópqabatty úılerdiń aýlasynan qorap ishinen tabylǵan. Oqıǵa ornyna shuǵyl túrde jedel-tergeý toby jetti. Kýágerdiń aıtýynsha, ol keshkilik ýaqytta úıinen shyǵyp bara jatyp aýladaǵy oryndyqta turǵan karton qorabty kórgen. Ishinen kórpeshege oralǵan sábıdi kórip jaqyn mańdaǵy aýrýhanaǵa jetkizgen. Dárigerler anasy shamamen eki saǵat buryn úı jaǵdaıynda bosanǵanyn aıtty.
«Náreste merziminen buryn dúnıege kelgendikten, jaǵdaıy ázirge aýyr. Qazir bala perınataldyq ortalyqta dárigerlerdiń baqylaýynda», dep habarlady Qaraǵandy oblysy Polısııa departamentiniń baspasóz qyzmeti.
Polısııa qyzmetkerleri jedel-izdestirý is-sharalary barysynda balanyń 23 jastaǵy anasyn anyqtap, ustady. Atalǵan fakti polısııada tirkelip, tergeý amaldary bastaldy.
