Sıyr súzgen úsh adam jaraqat aldy: bir er adam jambasy syndy degen kúdikpen aýrýhanaǵa jatqyzyldy. Bir áıel qashyp bara jatyp ókshesin taıdyryp alypty. Al bir zeınetker aıaǵyn syndyrǵan.
Polıseıler janýardy qalanyń ana buryshynan myna buryshyna qaqpaqyldap qýyp júrip, úsh saǵat degende áreń quryqtap, kók sıyrdyń qalanyń ishindegi soıý sehtarynyń birine mal apara jatqan kólikten sekirip túsip qalǵanyn anyqtady. Bireýler bul sıyr qutyrǵan bolýy kerek degen boljam jasapty. Biraq arnaıy kelip teksergen veterınar mamandar janýardyń sap-saý ekenin aıtty.
Aýylda mundaı qıturqy minez kórsetse, kók sıyr birden pyshaqqa iliner me edi. Qalalyqtardyń ıi jumsaq qoı, qansha súzip, jaraqattap jatsa da, janýardy aıap, janashyrlyq tanytýshylar kóbeıdi. Olar áleýmettik jeli arqyly úndeý jarııalap, sıyrdy soıý sehyna bermeımiz, qarjy jınap ózimiz satyp alamyz, óz ómiri úshin mundaı kózsiz erlik kórsetken janýar ómir súrýge ábden laıyq dep urandatty.
Janashyr top aqyry degenderine jetipti. Sıyrdyń ıesi olarǵa ózi habarlasqan kórinedi. Eriktilerdiń aıtýynsha, etke ótkizýge alyp ketip bara jatqan janýardyń buzaýy bar eken. Kóliktiń shanaǵynan sekirip túsken bette tóli qalǵan tústikke qaraı bet alǵan janýar qaladaǵy qaptaǵan kólik pen antalaǵan adamdardyń ortasyna túsip qalyp alasursa kerek.
Qazir ábden qatalap qalǵan kók sıyr qaýipsiz, jaıly turaqqa ornalastyryldy. Elena esimdi meıirimdi áıel janýardy buzaýymen qosyp satyp alypty. Jańa qojaıyn buzaýly sıyrynyń qujattaryn rettestirip jatyr.
– Polısııadan qashyp júrgende artqy aıaǵynyń sińirin sozyp alypty, ony da emdetetin bolamyz, – dedi Elena.
Qostanaı oblysy
