Memleket basshysy Qasym-Jomart Toqaev Jańa Qazaqstan tehnologııasy qýatty elge aınalý kerek ekenin, bul úshin eldiń bolashaǵyna tehnıkalyq salanyń mamandary kóptep qajet bolatynyn aıtqan-dy. Osyǵan oraı 2022-2023 oqý jylyna joǵary bilim alýǵa berilgen memlekettik bilim berý grantynyń kóp bóligi tehnıkalyq mamandar daıarlaýǵa qarastyrylǵan. Jalpy, aldaǵy oqý jylyna bakalavrıatqa 73 myńǵa jýyq grant bólindi. Ǵylym jáne joǵary bilim mınıstrliginiń málimdeýinshe, osynshama granttyń basym bóligi «Injenerlik, óńdeý, qurylys salalary» bilim berý baǵdarlama toptaryna bólindi, onyń sany 17 794 grantty quraıdy. Al «Pedagogıkalyq ǵylymdarǵa» – 10 810 grant, «Aqparattyq-kommýnıkasııalyq tehnologııalar» salasyna – 9 103 grant, «Jaratylystaný ǵylymdary, matematıka jáne statıstıka» baǵytyna – 6 288 grant tıesili. Sondaı-aq tehnıkalyq baǵyttarǵa erekshe nazar aýdarylyp, memlekettik tapsyrystyń úlesi 60%-ǵa deıin ulǵaıdy.
Prezıdent tapsyrmasyn oryndaý maqsatynda bilim berý grantynyń jańa túri anyqtaldy. Bul «Halyqtyń tyǵyz ornalasqan jáne batys óńirleriniń jastarynyń jetekshi joǵary oqý oryndarynda oqýǵa arnalǵan maqsatty bilim berý granty» dep atalady. Jańa grant Atyraý jáne Mańǵystaý oblystarynyń 10 myń talapkerine joǵary oqý oryndarynda bilim alý úshin maqsatty grant alýǵa múmkindik beredi. Maqsatty «Atyraý-Mańǵystaý» grantyna konkýrsqa bıylǵy mektep túlekteri qatysa alady. Biraq olar bir ýaqytta jalpy konkýrsqa, onyń ishinde «Serpin» baıqaýyna qatysa almaıdy.
