Qazir bul federasııanyń basty muraty shahmatty dáripteýden bólek, álemdik jetistikterge jetýde teń múmkindikter jasaý arqyly zııatkerlik ult qalyptastyrý bolyp otyr. Federasııanyń jańa quramyna birqatar tanymal isker azamat pen mesenat kirdi. Bir jaǵynan búginde Federasııa shahmatty mektep baǵdarlamasyna mindetti pán retinde engizýge árekettenip otyrǵanyn bilemiz.
Federasııa málimetterine súıensek, elimizde oılylar oıynyna degen suranys joǵary. Aýyz toltyryp aıtarlyq halyqaralyq jetistikterimiz de bar. Shahmattan Qazaqstan áıelder quramasy – álemdegi eń jas jáne eń bolashaǵy zor qurama. Elimizdiń 200 myńnan astam azamaty úzbeı shahmat oınaıdy, odan bólek, 50 myńnan asa bala shahmatpen aınalysady. Qazaqstan qorjynynda 2015 jyldan beri balalar men jasóspirimder arasyndaǵy álem chempıonattarynan 40-tan astam medal bar. Jastardyń álem chempıonattary men Azııa chempıonattarynda 400-den astam ul-qyzymyz júldeli oryndarǵa ıe boldy. Sol sııaqty qazirgi tańda shahmat seksııalary men úıirmelerine baratyn 30 myńnan astam bala jekeleı qarjylandyrylǵan.
Kezdesý barysynda Qazaqstan shahmat federasııasynyń vıse-prezıdenti Dármen Sádýaqasov áıelder ulttyq quramasynyń jetistikterine toqtala otyryp: «Eger biz áıelder quramasy týraly bólek aıtatyn bolsaq, Qazaqstannyń komandasy reıtıng boıynsha besinshi, jas ereksheligi boıynsha eń jas komanda, demek, komandanyń áleýeti zor. Quram óte úlken rezervke ıe. Eger qazaqstandyq talanttar týraly sóz qozǵaıtyn bolsaq, onda Ásel Serikbaıdy erekshe atap ótýge bolady, ol 2021 jyldyń jeltoqsanynda ótken shahmattan áıelder arasyndaǵy álem chempıonatynda besinshi oryn alǵan, bıyl álem chempıony atanǵan Qazybek Nógerbek buǵan deıin de basqa túrli jarysta baq synaǵan», dedi Dármen Sádýaqasov.
Spıker óskeleń urpaq arasynda zııatkerlik oıyndy nasıhattaý máselelerine keńinen toqtala otyryp: «Shyntýaıtyna kelgende, shahmat salasyn qarjylandyrý jetkiliksiz. Elimizde sapaly shahmat ınfraqurylymynyń bolmaýy saldarynan balalarǵa sabaq kóp jaǵdaıda jalǵa beriletin úı-jaılarda ótkiziledi. Qarjylandyrýdyń jetkiliksizdigi men ınfraqurylymnyń bolmaýy shahmatshy balalardyń kásibı daıyndalýyna kedergi keltirip júr», dedi Dármen Sádýaqasov.
Spıker О́zbekstanda shahmat oıyny boıynsha bilim berýdi damytýdyń joǵary deńgeıi qalyptasqanyn atap ótti. Kórshi elde shahmat mektep baǵdarlamasyna mindetti pán retinde engizilgen.
Basqosýda Almaty qalasy kásipkerler palatasynyń dırektory Aıtýar Qoshmambetov Federasııanyń bastamalaryn qoldaı kele: «Balalardy shahmatqa jappaı baýlý – adamı kapıtalǵa salynǵan jaqsy ınvestısııa. Bul baǵytta Almatyda jaqsy múmkindikter bar. Federasııa bastamalarynan basqa, ońtústik astanada túrli úıirme men mektep jumys isteıdi. ArtSport baǵdarlamasy arqyly balalar shahmatty tegin úırenip júr. Shahmat úıirmeleri mektepterde trendke aınalýǵa tıis», dedi.
ALMATY
