Taldaýǵa sáıkes, Qazaqstan halqynyń sany 2030 jylǵa qaraı 20,8 mln-nan 21,5 mln-ǵa deıin, al 2050 jylǵa qaraı 23,5 mln-nan 27,7 mln-ǵa deıin ósýi múmkin.
«Bul rette, eger ólim men týý kórsetkishteri 2021 jylǵy deńgeıde, al syrtqy jáne óńiraralyq kóshi-qon 2017-2021 jyldardaǵy ortasha mánde saqtalsa, Qazaqstan halqynyń sany 2030 jylǵa qaraı 20 mln 958 myń adamǵa, al 2050 jylǵa qaraı 27 mln 192 myń adamǵa deıin jetedi», dedi Eńbek resýrstaryn damytý ortalyǵynyń dırektory Dmıtrıı Shýmekov.
Ol ERDO tańdalǵan bazalyq jylǵa, týý deńgeıine, ólim-jitimge jáne kóshi-qonǵa baılanysty ár óńir boıynsha 27 negizgi boljamdy atap ótti. Sondaı-aq halyqtyń sanyn osy negizgi kórsetkishter sheńberinen tys modeldeýge múmkindik beretin mehanızm jasaldy, mysaly, týý kórsetkishin joǵarylatý nemese ólimdi belgili bir paıyzǵa tómendetý.
Onyń málimetinshe, 2030 jylǵa qaraı boljam boıynsha halyq sany Nur-Sultan qalasynda – 420 myń adamǵa nemese 33%-ǵa, 1,7 mln adamǵa deıin, Almaty qalasynda 414 myń adamǵa nemese 20%-ǵa, 2 mln 466 myń adamǵa deıin, Shymkent qalasynda 369 myń adamǵa nemese 32%-ǵa, 1,5 mln adamǵa deıin ósedi.
Budan basqa, Túrkistan oblysynda halyq sany 207 myń adamǵa, Mańǵystaý oblysynda 170 myń adamǵa, Almaty oblysynda 145 myń adamǵa ulǵaıady. Shyǵys Qazaqstan, Qostanaı, Soltústik Qazaqstan, Qaraǵandy, Pavlodar jáne Aqmola oblystarynda halyq sanynyń qysqarýy kútilýde.
