«Memleket basshysy halyqty qoljetimdi baspanamen qamtyp, áleýmettik shıelenisti boldyrmaý úshin ofteık-kelisimsharttar («kiltimen satyp alý») arqyly kredıttik baspana salyp, ony muqtaj azamattarǵa 2020-2025 jyldarǵa arnalǵan «Nurly jer» memlekettik baǵdarlamasynyń baǵasymen satyp áperý mehanızmin engizýdi tapsyrǵan bolatyn. Atalǵan mehanızmdi iske asyrý úshin «Turǵyn úı saıasatyn reformalaý máseleleri jónindegi zańnama aktilerine ózgerister men tolyqtyrýlar engizý týraly» Zań jobasynyń aıasynda Úkimettiń qorytyndysy ázirlenip jatyr. Ol qorytyndy Bıýdjet kodeksine tehnıkalyq turǵyda kúrdeli emes nysandar salýǵa qoıylatyn shekteýlerdi alyp tastaıtyn túzetýler engizýdi kózdeıdi. Bul túzetýler «kiltimen beriletin» nysandardy bir uıymnyń jobalap, salýyna múmkindik beretin bir konkýrstyń aıasynda ofteık-kelisimshart jasaýǵa múmkindik beredi», dep jazylǵan vıse-premerdiń jaýabynda.
Onyń aıtýynsha, osynyń arqasynda turǵyn úı salýshylardyń qoljetimdi baspana jobalaryn iske asyrýǵa qyzyǵýshylyǵy artpaq. Konkýrs jarııalanǵan kezde tehnıkalyq erekshelikterimen birge qajetti páterlerdiń ólshemderi men sany kórsetiledi. Sondaı-aq jer telimi men jobalyq-smetalyq qujattamanyń, qurylys-montaj jumystarynyń quny birge eseptelgen jalpy somasy kórsetiledi. Sonymen birge qurylystyń sapasy men ashyqtyǵyn qamtamasyz etý úshin «E-Qurylys» júıesi kezeń-kezeńmen iske qosylady.
«Jalpy turǵyn úı-kommýnaldyq ınfraqurylymdy damytýdyń 2022-2026 jyldarǵa arnalǵan tujyrymdamasy áleýmettik kredıttik baspana qurylysyn 1 sharshy metrge 290 myń teńge kóleminde, sondaı-aq jeke menshik qurylys kompanııalaryn yntalandyrý kezinde ınjenerlik-kommýnıkasııalyq ınfraqurylym qurylysyn 1 sharshy metrine 310 myń teńgege deıin qarjylandyrý kózdelgen. Búgingi memlekettik satyp alýdyń modeli ınjenerlik-komýnıkasııalyq ınfraqurylym nysandaryn jobalaý boıynsha jeke baspana men áleýmettik ınfraqurylym qurylysy boıynsha jeke konkýrs júrgizýdi qajet etetinin aıtý kerek. Bul konkýrs prosedýralaryn uzartyp, nysandardyń qoldanysqa berý merzimin keshiktiredi», delingen jaýapta.
