«Ortalyq» qosalqy stansııasy «KEGOC» AQ-nyń «Túrkistan qalasynyń syrtqy elektrmen jabdyqtaý shemasyn kúsheıtý. Elektr jelilik obektiler salý» jobasynyń aıasynda Saýran aýdany aýmaǵynda, Túrkistan halyqaralyq áýejaıyna jaqyn mańaıda salyndy. Jalpy quny 9,93 mlrd teńgeni quraıtyn joba kompanııanyń menshikti qarajaty esebinen iske asyryldy.
Jańa qosalqy stansııany iske qosý rásimine Túrkistan oblysynyń ákimi О́mirzaq Shókeev, «Samuryq-Qazyna» AQ Basqarma tóraǵasy Almasadam Sátqalıev, «KEGOC» AQ Basqarma tóraǵasy Qanysh Moldabaev, sondaı-aq merdigerlik uıymdar men jergilikti atqarýshy organdardyń ókilderi qatysty.
– Jańa qosalqy stansııa Túrkistan energııa torabyn elektrmen jabdyqtaýdyń qosymsha ortalyǵyna aınalady. Sonyń nátıjesinde, jergilikti elektr taratý jelisin damytý úshin tıisti jaǵdaılar jasalatyn bolady. Sondaı-aq óńirlik jeliniń qajetti ótkizý qabileti qamtamasyz etiledi. Jańa energetıkalyq obektiniń iske qosylýy óńirdiń ındýstrııalyq-ınnovasııalyq damýyna sony serpin beredi. Sonymen birge aımaqtyń 300 myńǵa jýyq turǵyny sapaly elektr energııasyna qol jetkizedi. Osylaısha, «Ortalyq» qosalqy stansııasy qurylysynyń jobasy birneshe mańyzdy máseleniń oń sheshimin tabýǵa múmkindik berip otyr, – dep atap ótti «KEGOC» kompanııasynyń basshysy Qanysh Moldabaev. – Túrkistan oblysy, ásirese Túrkistan qalasy qarqyndy damyp otyrǵandyqtan, sapaly elektr qýatymen jabdyqtaýdy qajet etedi. Joba sheńberinde 220 kV jáne 110 kV ashyq taratý qurylǵylary, 10 kV jabyq taratý qurylǵylary, jalpy qosalqy stansııalyq basqarý pýnkti, órt sóndirý sorǵy stansııasy, qosalqy ǵımarattar (kólikjaı, BО́P), kirme avtomobıl joly salyndy.
Jańa qosalqy stansııa 220kV quraıtyn eki energetıkalyq jeli baılanysymen qamtamasyz etilgen. Árqaısysynyń qýaty 125 MVA-ǵa teń eki transformator ornatylǵan. Al energııa obektisiniń jalpy nomınaldyq qýaty – 250 MVA. Osynyń nátıjesinde, jergilikti elektr taratý jelisiniń, óńirlik jeliniń qajetti ótkizý qabiletiniń damýyna tıisti jaǵdaılar jasalyp otyr. Jaz kezinde Túrkistan 50-60 megavatt elektr qýatyn tutynady. Endigi jerde jańa energııalyq qýatty shamamen 180 megavatqa kóterýge múmkindik bar. Iаǵnı burynǵy tutyný kórsetkishinen úsh esege artady.
Oblys ákimi О́mirzaq Shókeev Túrkistan qalasyn damytýdyń birinshi kezeńi aıaqtalǵanyn, tórt jyldyń ishinde halyqaralyq áýejaı, ákimshilik-iskerlik jáne mádenı-rýhanı ortalyqtar, ıaǵnı qalanyń negizgi áleýmettik ınfraqurylymy salynǵanyn atap ótti. Qala aýmaǵynda bıik ǵımarattar, mádenıet jáne sport ǵımarattary, áleýmettik obektiler paıda boldy. Al óńirde bıznesti órkendetý, qalanyń ınfraqurylymyn damytý sapaly ári turaqty energııamen jabdyqtaýdy talap etedi.
«KEGOC» AQ Kúrdeli qurylys jáne paıdalaný jónindegi basqarýshy dırektory Ermahanbet Ataqulov jobanyń áleýmettik mańyzdylyǵyna toqtalyp ótti.
– Qurylys kezinde 114 jumys orny qurylǵan edi, al paıdalanýǵa berilgennen keıin qosalqy stansııada 10 adam turaqty jumys isteıtin bolady. Budan basqa, jobany iske asyrý kezinde otandyq óndiris materıaldary men jabdyqtary paıdalanyldy, – dedi E.Ataqulov.
«KEGOC» AQ-ǵa qarasty «Ońtústiktiń júıearalyq elektr jelileri» fılıalynyń basshysy Sergeı Goldshteınniń aıtýyna qaraǵanda, jýyrda jylyjaı sharýashylyqtaryn qosymsha 30 MVA-ǵa qosýǵa ótinish kelip túsken. Jańa energetıkalyq obektiniń járdemimen qalalyq jylý-elektr ortalyǵy, «Iаssy», «Sever», «Kommýnalnaıa», «Saýran» jáne «Soltústik» qosalqy stansııalary qýattaryn arttyryp, osy arqyly Túrkistannyń ındýstrııalyq aımaǵynda ornalasqan kásiporyndar qajetti elektr energııasyna qol jetkizedi. Bul – jergilikti óndiris oryndary elektr qýatyn «Ońtústik jaryqtan» emes, tikeleı KEGOC-tyń jelilerinen alatyn bolady degen sóz.
Qosalqy stansııa tehnologııalyq prosesterdi baqylaıtyn avtomatty júıemen, elektr energııasynyń kommersııalyq esebin júrgizetin avtomatty ólsheý qurylǵysymen jáne tehnıkalyq qaýipsizdik maqsatynda obektini baqylaıtyn quraldarmen jabdyqtalǵan. Dıspetcherlik keńseniń kompıýter monıtoryna qosalqy stansııa jumysynyń barlyq málimeti túsip otyrady. Bul óz kezeginde dıspetcherge tez áreket etip, shuǵyl sheshim qabyldaýǵa, jelidegi avarııalyq óshýdi boldyrmaýǵa, osylaısha, tıimdi ári senimdi qyzmetti qamtamasyz etýge múmkindik beredi.
– Bul – zamanaýı qosalqy stansııa, munda tek jańa qondyrǵylar ornatylǵan. Mundaı orynda jumys isteý men úshin mańyzdy ári qyzyqty, – dedi Nur-Sultan qalasynan Túrkistanǵa jańa jumysqa aýysyp, kóship kelgen kezekshi elektromonter Nyǵmetáli Sultan. – Men ózim Saryaǵashtan bolamyn. KEGOC-tyń konkýrs jarııalaǵanyn estip, qalaı da qatysýym kerek dep sheshtim. Baıqaýdan ótkenime qýanyshtymyn. Kompanııada jumys isteý – men úshin zor mártebe, kásiporynnyń kelesheginen de mol úmit kútýge bolady.
Táýelsizdik jyldary ishinde elimizdiń ońtústiginde osyndaı 220 kV qýatty qosalqy stansııa alǵash salynyp otyr.
– Egemen el bolǵaly Túrkistan oblysynda mundaı aýqymdy energetıkalyq joba bolmaǵan edi. О́ńirdegi elektr energııasyna qajettilikti eskerip, taǵy osyndaı birqatar obektini salýdy josparlap otyrmyz. Ońtústik aımaqty turaqty ári senimdi elektr qýatymen qamtamasyz etý óte mańyzdy. Sol sebepti bizdiń kompanııa bul baǵyttaǵy tıisti jumystardy jalǵastyratyn bolady, – dedi «KEGOC» kompanııasynyń basshysy Qanysh Moldabaev.
