Festıvaldyń ambassadory – Street workout qozǵalysynyń negizin qalaýshylardyń biri Aıtym Jakýpovtyń aıtýynsha, maqsat – buqaralyq sportty damytý, jastardy salamatty ómirge baýlý. Sol sebepten oǵan qatysýshylardyń jynysyna da, jasyna da shekteý qoıylmady. Qatysýǵa nıet bildirgenderdiń bári tirkeldi.
Qatysýshylardyń arasynda 6 jasar eki búldirshin bar. Onyń biri – Ibragım Asqaruly týrnıkke 15 ret tartylyp, kórermen yqylasyna bólendi. Al ekinshisi – Ábdirahman Esenjan 8 márte tartylyp, sportqa beıim ekenin kórsetti. Atyraýlyqtardyń arasynan eń jasy úlken qatysýshylardyń legin bastaǵan 64 jastaǵy zeınetker Baqtyǵalı Qarakózov jastardyń qulshynysyn oıatty.
– Týrnıkke tartylý – jas talǵamaıtyn sport túri. Zeınetker bolsam da týrnıkke tartylýdy áli tastamaı kelemin. Bul jarysqa jastardy jigerlendirý, qulshynysyn arttyrý úshin qatystym, – deıdi Baqtyǵalı Qarakózov. Jigittermen birge týrnıkke bir boıjetken tartyldy. Ol – 17 jasar Dana Ábdirova. Onyń esimi tek atyraýlyqtarǵa ǵana emes, Azııa qurlyǵyna da tanymal. Bala kúninen dzıýdo sportymen aınalysady. Bıylǵy sáýirde dzıýdoshy arý Tashkent qalasynda ótken Azııa kýboginiń ıegeri atanǵan edi.
Al jaqynda Taıland eliniń astanasy – Bangkok qalasynda jalaýy jelbiregen Azııa chempıonatynda 57 kılo salmaqta synǵa tústi. Bul dodanyń fınalynda Úndistan balýany Lıntoı Chanambamnan utylyp, Azııa chempıonatynyń kúmis júldegeri atandy. Biraq týrnıkke tartylý tatamı sheberine ońaı bolmady.
Atyraýlyq jigitter týrnıkke 4 917 márte tartyldy. Onyń ishinde eń úzdik nátıje Amangeldi Ýtepovtiń enshisine jazyldy. Ol týrnıkke ekinshi kezeńde 33 márte tartylyp, 80 kıloǵa deıingi salmaq kategorııasynda úzdik dep tanyldy. Al 32 ret tartylǵan Tımofeı Hvan men Aqjol Salıhadın 18-35 jas tobynda 65 kıloǵa deıingi salmaqta birdeı nátıje kórsetti.
«Tartyl Fest» sport festıvalinde 9 salmaq kategorııasy boıynsha birinshi oryn ıelengen jeńimpazdarǵa 200 myń teńgeniń sertıfıkaty men Nur-Sultan qalasynda 8 qyrkúıekte ótetin grand-fınalǵa joldama berildi. Ekinshi oryn júldegerlerine 100 myń teńgeniń, úshinshi orynǵa ıe bolǵandarǵa 50 myń teńgeniń sertıfıkaty tapsyryldy.
Atyraý oblysy
