Sondaı-aq «Azamattarǵa arnalǵan úkimet» memlekettik korporasııasy «Halyqtyń tabysyn arttyrýdyń 2025 jylǵa deıingi baǵdarlamasy» keshendi josparyn oryndaý aıasynda bıyl shildeden bastap óz qyzmetkerleriniń jalaqysyn 25 paıyzǵa arttyrdy. Bul – tıimdi jumys isteý men korporatıvti mádenıet deńgeıin arttyrý úshin jasalǵan strategııalyq qadam.
2022 jyldyń qańtarynda qyzmetkerlerdiń jalaqysy 25 paıyzǵa ósse, 1 shildeden bastap jalaqy mólsheri taǵy 25 paıyzǵa ulǵaıdy. Jalpy alǵanda, jalaqy ósimi 50 paıyz boldy.
«Memlekettik korporasııa «bir tereze», «bir ótinish» úderisterin barynsha ońaılatý men ońtaılandyrý maqsatynda proaktıv qaǵıdaty boıynsha memlekettik qyzmetterdi jeke jáne zańdy tulǵalarǵa kórsete otyryp, ózin tolyqqandy biryńǵaı provaıder esebinde bekitti. Qyzmetkerlerdiń jalaqysyn kóterý – memlekettik qyzmetter júıesin odan ári tabysty damytýdaǵy óte mańyzdy másele ekeni anyq. Memlekettik korporasııa qurylǵannan keıin, ókinishke qaraı, bizdiń qyzmetkerlerimiz belgili bir statýssyz qalǵan bolatyn. Olar memlekettik qyzmetkerlerge de, memlekettik qyzmetshilerge de jatpaıdy. Qyzmetkerlerimiz óte bilimdi, azamattar úshin naqty qolaıly jaǵdaı jasaı biletin mamandar, kópshiligi – jastar. Qazir klıentter memlekettik organdardyń tabaldyryǵyn tozdyrmaı, kez kelgen anyqtamany ońaı ala alady, ýaqytyn, qarajatyn aıtarlyqtaı únemdeıdi. Eńbekaqyny arttyrýdyń nátıjesinde, qyzmetkerlerdiń jalaqysy 150 myń teńgege jetti. Memlekettik korporasııanyń basshylyǵy buǵan ishki shyǵyndardy ońtaılandyrý jáne bıznes-prosesterdi avtomattandyrý arqyly qol jetkizdi. Inflıasııa men úlken qalalardaǵy ómirdi eskersek, jalaqy áldeqaıda joǵary bolýy kerek. Bul máseleni Parlament depýtattary da kóterdi. Jalaqyny kóterý jáne qyzmetkerlerimizdiń mártebesin aıqyndaý máselesi Úkimet tarapynan tıisti nazar aýdarýdy talap etedi dep oılaımyn», dedi «Azamattarǵa arnalǵan úkimet» memlekettik korporasııasynyń ombýdsmeni Maıra Aısına.
Buǵan deıin memlekettik korporasııa qyzmetkerleriniń jalaqysy 85-115 myń teńge bolǵan, sońǵy 5 jylda qyzmetkerlerdiń aılyǵy aıtarlyqtaı óspegen.
«Azamattarǵa arnalǵan úkimet» memlekettik korporasııasynda búginde 22 myńǵa jýyq qyzmetker jumys isteıdi. Bul – 20 fılıal, 328 front jáne 442 bek-ofıs, 68 mobıldik HQO-dan turatynyn aıta ketken jón.
ALMATY
