Búginge deıin kósheniń ataýy nemese úılerdiń nómirlenýi ózgerip ketse, turǵyndar da óz qujattaryna ózgerister engizýge týra keletin. О́ıtkeni úıdiń ornalasqan jeri týraly derekter aýyssa, ondaı qujatty bank te, notarıýs ta qabyldamaıdy. Buǵan keminde 10 jumys kúni qajet boldy. Buryn tipti jurtshylyq aldymen Halyqqa qyzmet kórsetý ortalyǵynan mekenjaıdyń ózgergeni týraly anyqtama alyp, odan keıin mekenjaıdy anyqtatý úshin sáýlet basqarmasyna júginetin.
Kópshilik mekenjaı deregi ózgergende ony der kezinde aýystyrmaı, ýaqyt sozyp júrip alady. Al bul qujat jyljymaıtyn múlikti satqan kezde, kepilzatty tirkeý kezinde, turǵyn úı-kommýnaldyq qyzmetter mamandary men kóshi-qon qyzmeti bólimderi talap etkende jáne aımaqtyń, oblystyń, qalanyń ataýy ózgergen kezde qajet bolady. Endi jańa qyzmettiń arqasynda turǵyndar mekemelerge baryp, ýaqytyn sarp etpeıdi. Jańadan iske qosylǵan memlekettik servısti paıdalana otyryp, múliktiń naqty mekenjaıyn ózdiginen rastaı alady. Aıta ketý kerek, eger jyljymaıtyn múlik týraly derekter bolmasa, onda servıste tek mekenjaıdyń ózgerý tarıhy ǵana kórsetiledi.
«Mekenjaıdyń ózgerý deregi týraly anyqtamany alý – el turǵyndarynyń arasyndaǵy eń tanymal qyzmet túri. Mundaı qujat Halyqqa qyzmet kórsetý ortalyqtary arqyly jylyna 3 mln ret beriletin. Ásirese baspanasyn satýǵa qoıǵan qazaqstandyqtar bul qyzmetke kóbirek júginedi. Al olardyń mekenjaı nemese jyljymaıtyn múlik dereginde qandaı da bir ózgerister bolsa, notarıýstar men bankter Halyqqa qyzmet kórsetý ortalyǵyna jiberýge májbúr. Endi, mine, adamdarǵa óte qajetti qujat ekenin eskere otyryp, onyń sıfrly nusqasyn iske qostyq», deıdi «Ulttyq aqparattyq tehnologııalar» AQ basqarma tóraǵasy Rostıslav Konıashkın.
Jańa servıs mekenjaıdyń tirkeý kodyn (MTK) qoldana otyryp, notarıýstar men bankterge, basqa da mekemelerge jyljymaıtyn múlik mekenjaıynyń ózgergeni týraly málimetterdi qaraýǵa múmkindik beredi. Budan bylaı olar mundaı qujatty azamattardan talap ete almaıdy.
«MTK boıynsha mekenjaılardyń muraǵattyq málimetteri» servısin paıdalaný úshin eGov.kz portalyna kirý qajet. Basty bettegi «Servıster» bóliminde «MTK boıynsha mekenjaılardyń muraǵattyq málimetteri» degen bólim bar. Ári qaraı paıdalanýshy portalda tirkeýden ótip, onlaın qyzmetke tapsyrys beredi. Mekenjaıdyń tirkeý kodyn toltyrǵannan keıin «tekserý» batyrmasyn basady.
«Suratýdy sátti óńdegen kezde EGov.kz portaly ekranynda mekenjaıdyń ózgerý tarıhy týraly málimetter kórsetiledi. Al MTK durys engizilmegen jaǵdaıda «Engizilgen mekenjaı kodyn (MTK) tekserýdi suraımyz» degen habarlama shyǵady, sondyqtan kodty qatelespeı, durys engizý kerek», deıdi «UAO» AQ baspasóz qyzmeti.
