Parlamenttiń joǵarǵy palatasynyń sessııana Majarstan Parlamentiniń vıse-spıkeri Shandor Lejak, TMU Aqsaqaldar keńesiniń Túrkııa tarapyndaǵy múshesi Bınalı Iyldyrym, TúrkPA Bas hatshysy Mehmet Súreııa Er, TÚRKSOI Bas hatshysy Sultan Raev, Túrki akademııasynyń prezıdenti Darhan Qydyráli, Qyrǵyzstan mádenıet, sport jáne aqparat mınıstri Azamat Jamankýlov, «Majar-Turan» halyqaralyq qorynyń jetekshisi, quryltaı uıymdastyrýshysy Andrash Bıro, sondaı-aq zııaly qaýym jáne halyqaralyq uıym ókilderi qatysty.
Keleli basqosýda sóz alǵan Akademııa basshysy D. Qydyráli bıyl jetinshi ret ótip jatqan Quryltaıdyń mańyzdylyǵyn atap ótti.
«Baýyrlas majar halqy ǵundar dáýirinen bastap Uly dala áleminiń bólinbeıtin bóligi retinde óziniń dańqty ótkenin búgingi kúnge deıin óz ultynyń tarıhı jadynda saqtap keledi. Munyń aıqyn kórinisi retinde Majarstan túrkologııa ǵylymynyń Eýropadaǵy eń iri ortalyǵy retinde belgili. Derd Almashı, Dıýla Nemet sııaqty kóptegen majar túrkitanýshy ǵalymdarynyń esimderi bizdiń ortaq tarıhymyzda altyn áriptermen jazylǵan. Sonymen qatar, bıyl Túrki akademııasy belgili túrkolog Armınıı Vamberıdiń týǵanyna 190 jyl tolýyn atap ótýde. Majar túrkologtarynyń ǵylymı eńbekteri bizdiń ortaq mádenı muramyzǵa jáne tilimizde kórinis tapqan myńjyldyq baılanysymyzdy kórýge múmkindik berdi», dedi D. Qydyráli.
Jıyn aıasynda Akademııa basshysy Majarstan Parlamentiniń vıse-spıkeri Shandor Lejak jáne «Majar-Turan» halyqaralyq qorynyń jetekshisi uıymdastyrýshysy Andrash Bıro kezdesip, ǵylymı yntymaqtasty nyǵaıtý jóninde pikir almasty. Sondaı-aq, kezdesýde D. Qydyráli quryltaı delegasııasyn arnaıy qabyldaǵan majar áriptesterine rızashylyǵyn bildirip, iltıpat kórsetip, Akademııanyń basyp shyǵarǵan kitaptaryn tartý etti.
Qabyldaýdan keıin delegattar Býgas qalasynda ótetin Quryltaıǵa qatysý úshin jolǵa shyqty.
