Elimizde áskerı qyzmetkerlerge barlyq jaǵdaı jasalǵan

ASTANA.7 mamyr. Astanada ótken áskerı sherýde Memleket basshysy qorǵanys salasyna zaman talabyna saı keń aýqymda qoldaý kórsetilip otyrǵanyn atap ótti. Bul týraly egemen.kz habarlady. Prezıdent áskerı qyzmetshilerdiń áleýmettik jaǵdaıyn jaqsartýǵa qatysty kóptegen jumystar atqarylǵanyn aıta otyryp: «Armııa zamanaýı qarý-jaraqpen jabdyqtalýda, jattyǵýlar turaqty ótkizilip turady, sarbazdar men ofıserlerdi áleýmettik qoldaýmen qamtamasyz etip kelemiz. Barlyq jerde áskerı qalashyqtar abattandyrylyp, jańa baspana, sport keshenderi salynyp jatyr. Bul – eldiń armııamyzǵa degen qamqorlyǵy. Qazaqstannyń Qarýly Kúshteri, ulttyq qaýipsizdik, ishki ister organdary, Memlekettik kúzet qyzmeti, Ulttyq ulan, Tótenshe jaǵdaılar mınıstrligi bári aldaryna qoıylǵan mindetterin laıyqty oryndaýda», – dedi. Memleket basshysy 2015 jyly Uly Otan soǵysynyń jeńisine 70 jyl tolatynyn, ony keńinen atap ótý qajet dep sanaıtynyn jetkizdi. Ol: «Árbir ardagerge kóńil bólip, qoldaý kórsetý kerek. Adamzat tarıhyndaǵy eń qanquıly soǵysta jeńiske jetken erler rýhyn biz árdaıym qaster tutamyz. Biz HHI ǵasyrda beıbitshilikke baǵyttalǵan jahandyq aýqymdaǵy bastamalar kóterip, júzege asyrýdamyz. Qazaqstan – ıadrolyq qarýǵa qarsy jalpyǵa ortaq dúnıejúzilik qozǵalystyń lokomotıvi, buny búkil álem joǵary baǵalap otyr», – dedi. Sondaı-aq, Prezıdent Otan qorǵaýshylarǵa qarata: «О́z qasterli boryshtaryńyzdy abyroımen atqaryńyzdar. Sizderdiń basty mindetterińiz – týǵan jerdiń tynyshtyǵyn kúzetý, táýelsizdigimizdi aıanbaı qorǵaý. Sizder qazaqstandyqtardyń barlyq býyny úshin ar-namystyń, jaýapkershiliktiń, patrıotızmniń úlgisi bolýǵa tıissizder. Búgingi sherý – armııamyzdyń qýatyn, bıik jaýyngerlik rýhyn jáne daıyndyǵyn kórsetýdiń taǵy bir múmkindigi, – dedi. Joldybaı Bazar. Derekkóz: egemen.kz. Foto: kagro.kz.