Kezinde aıqas alańynda eshkimnen jeńilmegen kúıi úlken sportpen qosh aıtysqan UFC chempıony Nýrmagomedovtiń muryndyq bolýymen Qazaqstanda úshinshi ret osyndaı dúbirli doda uıymdastyrylyp otyr. Alǵashqy jarys Almatyda ótse, ekinshisin Aqtaý qalasy qabyldady. Mine, endigi týrnırdiń jalaýy elorda tórinde jelbireıdi. Atalǵan jarystyń basty jekpe-jeginde 93 kılo salmaqtaǵy Dııar Nurǵojaı Eagle FC promoýsheniniń chempıondyq belbeýi úshin talasady. Oktagonda jeti kezdesý ótkizip, barlyǵynda jeńiske jetken jerlesimiz 28 jastaǵy Reseı sportshysy Konstantın Andreısevpen (18-14) aıqasady. Eger Dııar bul básekeni óz paıdasyna sheshse, onda ol bul uıymnyń altyn belbeýin ıelengen tuńǵysh qazaqstandyq faıter retinde tarıhta qalady.
