Áýe qorǵanysy kúshteriniń bas qolbasshysy avıasııa general-leıtenanty Nurlan Ormanbetovpen birge ushqysh-ǵaryshker avıasııalyq bazanyń ushý quramymen jáne merzimdi qyzmet sarbazdarymen kezdesti. Toqtar Áýbákirovke Sý-30SM ushaǵynyń jattyqtyrý kesheni kórsetildi.
Halyq qaharmany avıasııalyq bazanyń ushqyshtarymen joıǵyshtardaǵy ushý tájirıbesin bólisti, ǵaryshkerlerdi daıarlaý jóninde áńgimelep berdi. Áýe qorǵanysy kúshteriniń áskerı ınstıtýtyn taıaýda bitirgen túlekterine, jas leıtenanttarǵa nusqaý berdi. Áskerı-áýe kúshteri ofıserleriniń jas býyny úshin bul eńbek sińirgen ushqysh pen ǵaryshkerden sheberlik sabaǵy boldy. Olar batyrdyń ómirbaıany jaıly jáne kásibı qyzmeti týraly áńgimege qanyqty.
– 1969 jyly men Armavır joǵary áskerı Qyzyl Tý avıasııalyq ÁShQQ ushqyshtar ýchılıshesin «ushqysh-ınjener» biliktiligimen bitirdim. Qyzmet barysynda 50-den astam ushaqpen ushyp úırendim. 1988 jyly maǵan Keńes Odaǵynyń batyry ataǵy berildi. Avıa tasymaldaýshynyń qonýdaǵy qıyndyqtary óz aldyna. Tehnıka men aerodınamıkanyń qyr-syryn meńgerýge tıissiń, qansha jerden talantyń bolsa da ol kómektespeıdi. Kúndelikti tynymsyz eńbek pen bilimge degen qushtarlyq – naǵyz jetistikke jetýdiń joly! – dedi Toqtar Áýbákirov.
Merzimdi qyzmettegi áskerı qyzmetshiler qonaqtyń mazmundy jáne qyzyqty áńgimelerin erekshe qyzyǵyp tyńdady. Qatardaǵy jaýynger Janarbek Ańsar aty ańyzǵa aınalǵan ushqysh-ǵaryshkerdiń sózderi oǵan salmaqty oı salǵanyn aıtty. Merzimdi qyzmet aıaqtalǵannan keıin ol Áýe qorǵanys kúshteriniń áskerı ınstıtýtyna túsip, birneshe jyldan keıin sol bólimge leıtenant bolyp oralyp, joıǵyshta ushý úshin kelisimshart boıynsha qyzmet etýdi josparlap otyr.
– Eldiń tutastyǵy men egemendigi bizdiń konstıtýsııalyq paryzymyzdy adal oryndaýymyzǵa baılanysty ekenin uǵýǵa tıispiz. Alǵa «batyr bolamyn» dep emes, «úırenemin» degen maqsat qoıý kerek. Kúnde ózińniń istegen isińe esep berýge tıissiń. Jetistikke jetý joly áskerı ǵylymdy úırenýge, bilýge baılanysty ekenin túsiný qajet, – dedi ataqty qonaq jaýyngerlerge.
