Qoǵam • 18 Tamyz, 2022

Alla úıine «alýǵa» baratyndar azaıar emes

106 ret kórsetildi

Allanyń jerdegi úıine baratyndardyń ishinde urlyqty «tirlikke» aınal­dyr­ǵandardyń qarasy azaıar emes. «Qudaıdan qoryqpaǵannan qoryq» degen sózdiń baıybyna barǵan jergilikti halyq qoly júırik qaraqshylardan qatty qaımyǵyp qalǵan. Juma namazǵa barǵanda bir qolymen qaltasyn «baqylap» otyratyndary da sondyqtan.

Tarazdaǵy ortalyq meshit sanalatyn «Hıbatýlla Tarazıge» kelgenderdiń ishinen de urylar tabylyp jatyr. Jaqynda meshitke kelgen azamattardyń biri kıimder ilinip turatyn bólmelerdiń birinen 50 myń teńge jáne «iPhone 11» markaly telefondy urlap ketkeni týraly áńgime jeldeı esti. Jábir­lený­shi­lerdiń tıisti oryndarǵa der kezinde habarlasýynyń arqasynda polısııanyń jedel izdestirý tobynyń kómegimen kóp uzamaı kúdikti azamat ustaldy.

33 jastaǵy azamat Turar Rysqulov aýdanynyń turǵyny bolyp shyqqan. Ol óziniń qaraqshylyq áreketin úlken meshitte eshkim baıqamaı qalady degen oımen jasaǵanyn moıyndaǵan. Qazirgi tańda bul derek boıynsha Qylmystyq ko­dekstiń 188-babynyń 3-bóligimen (ur­lyq) sotqa deıingi tergep-tekserý amal­dary júrgizilip jatyr. Bıyl álgin­deı sıpattaǵy 3 derek tirkelse, byltyr me­shit­te urlyq jasap qolǵa tús­ken­derdiń sany beseýge jetipti.

Jambyl oblysynda 326 meshit bar bolsa, onyń 35-i Taraz qalasynda ornalasqan. Al juma kúni jurtshylyq meshitterge aǵylady. Tipti ortalyq meshitterdiń mańynda ıne shanshar oryn qalmaıdy. Alla úıine kelgender buryndary alańsyz qulshylyq jasaýdy oılasa, endi dúnıesin túgendep alańdap otyratyn jaǵdaıǵa jetti. О́ıtkeni qalta urylary dál osy juma namazda jurttyń qundy zattaryn qoldy qylýǵa beıil turady.

Oblystyq Polısııa departamenti krımınaldyq polısııa basqarmasynyń bólim basshysy, polısııa podpolkovnıgi Qanat Qojamqulovtyń aıtýynsha, qyl­mys­tyń bul sanaty oblys ortaly­ǵyn­da ǵana emes, aýdandarda da qylań bere bastaǵan.

«Qazirgi kúnge deıin meshitterdegi urlyq boıynsha 3 derek tirkeldi. Baızaq, Jambyl jáne Jýaly aýdandarynda qaraqshylardyń meshitke baratynyn baıqadyq. Búginde kúdiktilerdi anyqtaý maqsatynda tergeý amaldary júrgizilip jatyr», deıdi ol.

Quzyrly organ qyzmetkeriniń aıtýyn­sha, qolynyń suǵanaǵy bar urylardy tıisti deńgeıde jaýapkershilikke tartpaı, meshitterde urlyq-qarlyqtyń tyıy­lýy ekitalaı. Alaıda ishinara meshit qyz­met­ker­leri álgindeı qylmysty jasyryp jatady eken.

«Búgingi kúnge deıin meshit ımamdary urylardyń alysqa ketýine múmkindik bermeı, polısııa qyzmetkerlerine ustap berip júr. Soǵan qaramastan qylmysqa baratyndardyń sany azaımaı tur. Olar kameraǵa túsip qalmaý úshin betin búrkemelep alady. Sóıtip, keregin alyp, tabanyn jaltyratady. Áıtkenmen, urylar bir kameradan qutylǵanymen, ekinshi kameraǵa túsip, tutylyp jatady. Osylaısha, urlyq deregi der kezinde ashylyp jatyr. Dese de keıbir meshit ımamdary mundaı qylmystar jóninde tis jaryp aıta bermeıdi. Máselemen ýaqyt óte kele tanysyp jatamyz», deıdi oblystyq «Hıbatýlla Tarazı» meshitiniń naıb ımamy Ǵalymbek Tólegenuly.

Buryndary páter tonaýshylar qolǵa túskenin, qylmystyń izi sýymaı ashylyp jatqanyn estýshi edik. Mal urlyǵymen ustalǵandar týraly da jıi habardar bolatynbyz. Endi qaraqshylardyń meshitterdi jaǵalap júrgeni jaǵa ustatpaı qoımaıdy. Allanyń jerdegi turaǵyna baryp, qulshylyq pen «tirshilikti» shatastyratyn qaraqshylarmen kúresetin kún týady dep kim oılapty?! Qalaı bolǵan kúnde de meshitke barǵan halyq alańdaýmen álek bolyp júr...

 

Jambyl oblysy

Uqsas jańalyqtar