Saraptamalyq brıfıngke qatysqan L.N.Gýmılev atyndaǵy EUÝ-dyń Memleket jáne quqyq teorııasy men tarıhy, konstıtýsııalyq quqyq kafedrasynyń professory Ermek Abdrasýlov jańa týyndynyń mazmunyna M.S.Nárikbaev atyndaǵy QazMZÝ-nyń professory Indıra Áýbákirova Konstıtýsııadaǵy jańashyldyqtarǵa keńinen toqtaldy. Eýropalyq quqyq jáne adam quqyqtary sarapshylyq ınstıtýtynyń dırektory Marat Báshimov brıfıng barysynda Konstıtýsııaǵa ózgerister men tolyqtyrýlar engizilgen eki aı ishindegi eldegi basty ózgeristerdi atap ótti.
E.Abdrasýlovtyń aıtýynsha, osy ýaqyt aralyǵynda zańger ǵalymdar Ata Zańǵa engizilgen ózgerister men tolyqtyrýlarǵa túsinikteme kitap shyǵarǵan. Osylaısha mamandar «qysqasha bolsa da, ǵylymı baǵytta ár bapqa engizilgen ózgeristerge tolyq túsindirme berýge tyrysqan».
«Konstıtýsııa baptary óte qysqa jazylady. Konstıtýsııanyń kúshin, onyń áserin qazir, zańdar qabyldanǵansha sezinýimiz kerek. Árıne, Parlament demalystan shyqqan soń kóp zań qabyldanady. Biz Konstıtýsııa baptarynyń Jańa Qazaqstan, Ádiletti Qazaqstan, Ekinshi respýblıka degen jańa normalaryn paıdalanýymyz kerek», dedi professor.
Zań ǵylymdarynyń doktory Indıra Áýbákirova Konstıtýsııaǵa engizilgen túzetýlerge túsinikteme jazý kezinde avtorlyq toptyń neni basshylyqqa alǵanyn atap ótti. Onyń aıtýynsha, ǵalymdardyń basty jumysy Birinshi respýblıka men Ekinshi respýblıka arasyndaǵy alshaqtyqty anyqtaıtyn túzetýlerdiń mańyzdylyq, ózektilik dárejesimen baılanysty.
«Eń aldymen Memleket basshysynyń ıdeıasyn, quqyqtyq normalarǵa engizilgen jumys tobynyń ıdeıasyn túsindirý qajet boldy. Ekinshi maqsat – Ata Zańǵa engizilgen jańashyldyqtarǵa qatysty qoǵamda týyndaǵan saýalǵa naqty jaýap berý. Bul baǵytta aýqymdy, qomaqty jumys atqaryldy. Oqyrman bul kitapqa qatysty óz pikirlerin bildire jatar.
Al professor Marat Báshimov túsindirme kitapty «qoldanýǵa arnalǵan nusqaýlyq» dep atady. «Referendýmda biz mańyzdy ári syndarly Konstıtýsııalyq prınsıpterge, ádilettilikke daýys berdik. Magıstranttar men doktoranttarǵa arnalǵan dáristerde Memleket basshysy aıtqan normalar jıi aıtyldy. Azamattardyń memleketti basqarýǵa qatysýy úshin teńdik pen ádilettilik, ashyqtyq jáne qyzmettiń aıqyndyǵy qaǵıdattaryn árkim árqalaı túsinedi. Al Konstıtýsııanyń barlyq normalary, ony qalaı júzege asyratynymyz elimizdiń basty qujatymen tikeleı baılanysty», dedi ol.
Kitap avtorlary, ǵalymdar túsindirmelerdi talqylaýsyz bergen durys dep sheshken. Quqyq salasynda bedeli bar resenzentter de olardyń ustanymymen kelisip otyr. Qazirgi tańda jańa týyndy Ulttyq akademııalyq kitaphananyń saıtynda ornalastyrylǵan. Túsindirme jumysymen quqyqqa qyzyǵýshylyq tanytqan kez kelgen adam tanysa alady.
