Jıynda qurylys salasynyń mamandary jobalyq-smetalyq qujattyń durys jasalmaıtynyn aıtyp, ár tarap ózderiniń ýájderin jetkizip, qurylys salasyndaǵy kemshilikterdi talqyǵa saldy.
Kompanııa basshylary qurylys materıaldarynyń qymbattaǵanyn, sonyń saldarynan qurylys jumystarynyń keshigip jatqanyn, sondaı-aq ony jalǵastyrý úshin bıýdjetten qosymsha qarjy bólinse degen usynystaryn aıtty.
«Basty másele – jobalyq-smetalyq qujattyń durys jasalmaýy. Buǵan kim kináli: qurylysshy ma, jobalaýshy uıym ba, álde saraptaý uıymy ma? Jıynda osy másele uzaq talqylandy. Budan keıingi úlken másele – qurylys materıaldarynyń qymbattaýy. Búgingi tańda osy qymbatshylyqtyń kesirinen toqtap qalǵan qurylystardy júrgizý úshin bıýdjetti qaıta qaraý kerek», dedi Samat Musabaev.
Depýtat aldaǵy ýaqytta atalǵan máselelerdi baqylaýyna alatyn jetkizdi. Sonymen qatar Májilistiń baspasóz qyzmetiniń habarlaýynsha, depýtat Amanjol Áltaı Ulytaý oblysynyń Jezqazǵan qalasyndaǵy kıim jáne turmystyq jáne tehnıkalyq maqsattaǵy buıymdardy óndiretin «Iýtarııa» JShS eńbek ujymymen kezdesti.
Jezqazǵan qalasyndaǵy sehta búgingi tańda 300-den asa qyzmetker úsh aýysymda eńbek etedi. Tiginnen bólek, bul mekemeniń qala boıynsha birneshe saýda ortalyǵy bar. Onyń biri Jezqazǵan jáne Sátbaev qalalarynyń ortasynda ornalasqan gıpermarket eki qalanyń turǵyndaryn jumys ornymen qamtamasyz etip otyr.
Jıynda depýtat ujym qyzmetkerleriniń jalaqyǵa qatysty talap-tilekterin tyńdap, óndiristik salada eńbek etip júrgen azamattardyń máselelerin aldaǵy ýaqytta kóteretinin jetkizdi.
