О́ńirlik qoǵamdyq keńes múshesi, «Qaǵandyq» qoǵamdyq birlestiginiń tóraǵasy Erkeǵalı Janǵazy bul máseleni jýyqta Parlament Májilisiniń depýtattaryna joldady.
– Konkýrstyq qabyldaý prosesine súıensek, testileýden ótken jas maman ótinishti saıt arqyly beredi. Mektep ákimshiligi qabyldap alady da, bekitilgen talaptarǵa sáıkes ótinish berýshini jumysqa qabyldaıdy. Osy jerde keıbir bilim ordalary jas kadrlardan meılinshe bas tartyp, kóp jyl jumys istegen saqa muǵalimderdi tańdaıtyny baıqalyp qalýda. Dıplomyn qolyna jańa alǵan jas mamanda ne tájirıbe, ne jeke jetistikteri joq. Osy sebepterden jastar dál qazir jumysqa ornalasý múmkindiginen aıyrylyp otyr. Tipti zeınetke shyqqan ardager ustazdar da tizgindi bergisi kelmeı konkýrsqa qatysyp, jeńimpaz atanady da, jastar jumyssyzdar sanatyn odan saıyn molaıta túsýde.
Taǵy bir másele, bir muǵalimniń birneshe mekteptegi konkýrsqa qatysýǵa múmkindigi bar. Ol barlyq jerde jeńip shyqsa, tıisinshe barlyq vakansııany ıelenedi degen sóz. Al ol týraly mektep basshylyǵy tek 1 qyrkúıekte ǵana biledi. Al bul kemshilik mektepterdegi muǵalimderdiń jetispeýshiligin odan saıyn ulǵaıtady. Konkýrsty qaıta ótkizgenshe ýaqyt ótedi, ıaǵnı oqý prosesinde úlken kedergiler paıda bolady, deıdi qoǵam belsendisi.
Pedagogterdi mektepke qabyldaý úrdisindegi osy bir shıkilik joıylmasa, qolynda kúrekteı dıplomy bola tura jumysqa ornalasa almaı júrgen jas mamandardyń qataryn ósirip jiberetini aıdan anyq. Qoǵam ókilderi bul máseleni tez arada sheshýdi talap etip otyr. Aıtyp óteıik, búginde óńirde 18 myńnan astam pedagog bar. Orys tilinde bilim beretin oqý oshaqtarynda orys tili men ádebıeti, matematıka pánderiniń jáne bastaýysh synyptyń muǵalimderi jetispeıdi. Al memlekettik tildegi bastaýysh synyp muǵalimderi kerisinshe shamadan tys kóp ekeni baıqalady.
Aıtpaqshy, bıyl mektepterdegi dene tárbıesi muǵalimderiniń saǵattary da azaıtylyp jatqany málim. Jańashyldyqtyń kesirinen óńirde júzdegen pán muǵalimi qysqartylyp qalýy da múmkin eken.
Pavlodar oblysy
