«Barshańyzdy Konstıtýsııa kúnimen shyn júrekten quttyqtaımyn!
Ata Zań – táýelsizdigimizdiń tiregi, memlekettiligimizdiń negizi, eldigimizdiń kepili. Sondyqtan barlyq isimizdiń quqyqtyq bastaýy sanalatyn Konstıtýsııamyzdy ardaqtaý – ár qazaqstandyqtyń abyroıly mindeti.
Bıyl bul merekeniń máni burynǵydan erekshe. Memleket basshysy Qasym-Jomart Kemeluly Toqaevtyń bastamasymen konstıtýsııalyq reforma qolǵa alynyp, halqymyzdyń basym bóliginiń qoldaýymen Ata Zańǵa mańyzdy ózgerister engizildi. Sol sebepti, búgingi merekeni Jańa Qazaqstannyń taban tireıtin berik tuǵyry bolatyn jańartylǵan Konstıtýsııamen atap ótip jatyrmyz.
Konstıtýsııalyq reforma qalyptasqan saıası-quqyqtyq júıemizdi transformasııalaýǵa negiz boldy. Soǵan baılanysty Parlamenttiń jańa sessııasynda qoldanystaǵy zańnamany osy irgeli ózgeristerge sáıkestendirý jumysy qarqyndy jalǵasady.
Konstıtýsııa kúnimen quttyqtaı otyryp, ár shańyraqqa shattyq pen baq-bereke tileımin! Eldigimiz baıandy bolsyn! Ata Zańymyz mártebeli tuǵyrynan túspesin!», dedi Senat tóraǵasy áleýmettik jelidegi paraqshasynda.
